យោធាស៊ូដង់ខាងត្បូង បានចូលទៅគ្រប់គ្រងតំបន់ប្រេងដ៏សំខាន់ Heglig ក្រោមកិច្ចព្រមព្រៀងពុំធ្លាប់មានពីមុនរវាងប្រទេសពួកគេ និងភាគីបង្កសង្រ្គាមនៅប្រទេសជិតខាងស៊ូដង់ ដើម្បីការពារហេដ្ឋារចនាសម្ព័ន្ធថាមពលដ៏សំខាន់មួយនេះ នៅក្នុងសង្រ្គាមស៊ីវិលស៊ូដង់ ។

ការដាក់ពង្រាយកងទ័ពកាលពីថ្ងៃពុធ បានកើតមានឡើង ក្រោយកងកម្លាំងគាំទ្រហ័ស(RSF) ដណ្តើមបានទីតាំងយុទ្ធសាស្រ្តនេះ កាលពីថ្ងៃទី ៨ ខែធ្នូ ជាការរុញច្រានកងកម្លាំងប្រដាប់អាវុធស៊ូដង់(SAF) ឲ្យដកថយនៅទូទាំងតំបន់ព្រំដែនជាប់ប្រទេសស៊ូដង់ខាងត្បូង ជាទីដែលគេរាយការណ៍ថា ពួកគេបានទម្លាក់អាវុធចុះ ។ 

កិច្ចព្រមព្រៀងខាងលើ មានគោលបំណងអព្យាក្រឹតទីតាំងមួយនេះពីប្រតិបត្តិការសង្រ្គាម ស្របពេលដែលការប្រយុទ្ធគ្នាកាន់តែតានតឹងខ្លាំងនៅទូទាំងតំបន់ Kordofan របស់ស៊ូដង់ គំរាមកំហែងដល់ប្រភពប្រាក់ចំណូលចម្បងរបស់ប្រទេសទាំង ២ ។

ប្រភពផ្លូវការពីរដ្ឋាភិបាលស៊ូដង់ បានឲ្យដឹងថា កិច្ចសន្យាកម្រិតខ្ពស់ បានធ្វើឡើងរវាងថ្នាក់ដឹកនាំស៊ូដង់ និងស៊ូដង់ខាងត្បូង ចាប់តាំងពីដើមសប្តាហ៍នេះ ក្រោយកងកម្លាំង RSFចល័តវាយប្រហារតំបន់ Heglig ។

កិច្ចព្រមព្រៀងយោគយល់គ្នានេះ សម្រេចបាន ដើម្បីធានាដល់ការជម្លៀសកម្មករនៅក្នុងតំបន់ប្រេង ហើយនិងចៀសវាងការប្រឈមយោធា ហើយនិងធានាថា តំបន់ប្រេង Heglig និងហេដ្ឋារចនាសម្ព័ន្ធក្នុងតំបន់នេះ ពុំក្លាយជាកម្មវត្ថុនៃការបំផ្លិចបំផ្លាញដោយចេតនានោះទេ ខណៈដែលក្រុមមេដឹកនាំកុលសម្ព័ន្ធ រួមចំណែកដ៏សំខាន់ផងដែរ នៅក្នុងកិច្ចព្រមព្រៀងនេះ ៕