នាយករដ្ឋមន្ត្រីថៃ លោក អនុទីន ឆានវីរៈគុល បានប្រកាសកាលពីថ្ងៃព្រហស្បតិ៍ (១១ ធ្នូ) ថា លោកកំពុង «ប្រគល់អំណាចទៅឱ្យប្រជាជនវិញ» ដោយចាត់វិធានការរំលាយសភា និងបើកផ្លូវសម្រាប់ការបោះឆ្នោត លឿនជាងការរំពឹងទុកពីមុន។

អ្នកនាំពាក្យរដ្ឋាភិបាលថៃ លោក Siripong Angkasakulkiat បានប្រាប់សារព័ត៌មានរ៉យទ័រថា ជំហាននេះបានកើតឡើង បន្ទាប់ពីការមិនចុះសម្រុងនឹងគ្នា ជាមួយក្រុមនយោបាយធំបំផុតនៅក្នុងសភា គឺគណបក្សប្រជាជនថៃ ដែលជាបក្សប្រឆាំងដ៏សំខាន់។ លោកបានប្រាប់រ៉យទ័រថា «រឿងនេះបានកើតឡើងដោយសារយើងមិនអាចបន្តទៅមុខក្នុងសភាបាន»។

ក្រោយមក សារព័ត៌មានរាជវង្សថៃ បានប្រកាសនៅថ្ងៃសុក្រ ទី១២ ខែធ្នូ នេះថា ព្រះមហាក្សត្រថៃ មហា វិច្ចរ៉ាឡុងកន បានរាជានុម័តលើព្រះរាជក្រឹត្យរំលាយសភានេះ ដែលបើកផ្លូវឱ្យមានការបោះឆ្នោតមុនកាលកំណត់ ពោលគឺ បើតាមច្បាប់ ការបោះឆ្នោតត្រូវតែធ្វើឡើងក្នុងរយៈពេល ៤៥ ទៅ ៦០ ថ្ងៃ។

លោក អនុទីន គឺជានាយករដ្ឋមន្ត្រីទីបីហើយរបស់ថៃ ចាប់តាំងពីខែសីហា ឆ្នាំ២០២៣ មក ហើយអស្ថិរភាពនយោបាយផ្ទៃក្នុងដ៏ចម្រុងចម្រាសបំផុត កំពុងធ្វើឱ្យប៉ះពាល់ដល់សេដ្ឋកិច្ចដែលកំពុងតែដុនដាបរួចទៅហើយរបស់ប្រទេសនេះ។

គួររម្លឹកថា កាលពីខែកញ្ញា លោក អនុទីន បាននិយាយថា លោកមានគម្រោងរំលាយសភានៅចុងខែមករា ឆ្នាំ២០២៦ ហើយការបោះឆ្នោតសកល នឹងត្រូវធ្វើឡើងក្នុងខែមីនា ឬដើមខែមេសា ឆ្នាំដដែលនោះ ប៉ុន្តែចំណាត់ការរំលាយសភានេះ នឹងពន្លឿនពេលវេលាបោះឆ្នោតឱ្យលឿនជាងការរំពឹងទុក៕