ព័រទុយហ្គាល់ បានជួបការរំខានដ៏អាក្រក់បំផុតនៅទូទាំងប្រទេស កាលពីថ្ងៃព្រហស្បតិ៍ (១១ ធ្នូ) ដោយសេវាកម្មរថភ្លើងត្រូវបានផ្អាក ជើងហោះហើររាប់រយជើងត្រូវលុបចោល និងសាលារៀបានបិទទ្វារ ខណៈដែលសហជីពបានចាប់ផ្តើមកូដកម្មទ្រង់ទ្រាយធំទូទាំងប្រទេស ជាលើកដំបូងបំផុតក្នុងពេលជាង ១ទសវត្សរ៍ ហើយកម្មកររាប់ពាន់នាក់បានដើរក្បួនតវ៉ា ប្រឆាំងសំណើកំណែទម្រង់ពលកម្ម។

រដ្ឋាភិបាលកណ្តាលនិយមស្តាំ សំឡេងភាគតិច របស់ប្រទេសនេះ បាននិយាយថា កំណែទម្រង់ដែលស្នើឡើងនោះ - ពោលគឺការធ្វើវិសោធនកម្មជាង ១០០មាត្រានៃក្រមការងារ - មានគោលបំណងជំរុញផលិតភាព និងជំរុញកំណើនសេដ្ឋកិច្ច។ ប៉ុន្តែសហជីពចោទប្រកាន់ថា កំណែទម្រង់នេះបានផ្អៀងអំណាចទៅឱ្យនិយោជក ដោយធ្វើឱ្យប៉ះពាល់សិទ្ធិកម្មករ ទោះបីជាមានសេដ្ឋកិច្ចរឹងមាំ និងភាពអត់ការងារធ្វើទាបក៏ដោយ។

ហ្វូងកម្មករបានប្រមូលផ្តុំគ្នានៅមុខអគារសភា កណ្តាលទីក្រុងលីសបោន ដោយអ្នកខ្លះកាន់បដាតវ៉ាដែលសរសេរថា «និយាយថា ទេ ចំពោះកញ្ចប់ពលកម្ម» និង «ការបណ្តេញចេញដោយគ្មានហេតុផល គឺជាបទបញ្ជាតាមអំពើចិត្តរបស់ថៅកែ»។

បណ្ដាញដឹកជញ្ជូនសាធារណៈមួយចំនួនបានដំណើរការដោយផ្នែក ព្រោះតម្រូវការសេវាកម្មអប្បបរមាដែលដាក់ដោយអាជ្ញាធរ ប៉ុន្តែដងផ្លូវនានារបស់ទីក្រុងលីសបោន មានភាពស្ងប់ស្ងាត់គួរឱ្យកត់សម្គាល់។ មន្ទីរពេទ្យនៅតែបើក ប៉ុន្តែសេវាកម្មភាគច្រើនត្រូវបានពន្យារពេល ខណៈបុគ្គលិកគិលានុបដ្ឋាយិកាក៏បានដើរចេញពីការងារដើម្បីធ្វើកូដកម្មផងដែរ៕