​បាល់ទាត់៖ ​ប្រទេស​អ៊ុយ​ក្រែ​ន​ស្ថិត​ក្រោម​ការ​គំរាម​កំហែង និង​រង​ការវាយប្រហារ​ពី​សំណាក់​ប្រទេស​រុស្ស៊ី​នៅ​ថ្ងៃព្រហស្បតិ៍​ម្សិលមិញ​នេះ​។ ​បាល់ទាត់​នៅ​ជុំវិញ​ទ្វីប​អឺរ៉ុប​ជាពិសេស​នៅ​ការប្រកួត​ក្រប​ខណ្ឌ UEFA Europa League និង Europa Conference League យប់មិញ​រួមមាន​ក្លិប​បាល់ទាត់​កីឡាករ និង​អ្នកគាំទ្រ​សុទ្ធតែ​បាន​បង្ហាញ​ការ​គាំទ្រ និង​ស្នើ​ឱ្យ​បញ្ឈប់​សង្គ្រាម​នៅ​អ៊ុយ​ក្រែ​ន​។

​​កីឡាករ​ជំរើសជាតិ​អ៊ុយ​ក្រែ​ន Ruslan Malinovskyi បាន​ស៊ុត​បញ្ចូល​ទី២ ​គ្រាប់​ម្នាក់ឯង​ក្នុង​ជ័យជំនះ​របស់ Atalanta ៣-០ នៅ​ទឹកដី Olympiakos យប់មិញ និង​បាន​អបអរសាទរ​ដោយ​លើកដៃ​សំពះ និង​លាត់​អាវ​ដែល​មាន​សរសេរ​ពាក្យ​មានន័យថា “​បញ្ចប់​សង្គ្រាម​នៅ​អ៊ុយ​ក្រែ​ន​”​។ ​Zenit St. Petersburg ជា​ក្លិប​រុស្ស៊ី​តែមួយគត់​ដែល​មាន​ការប្រកួត​ម្សិលមិញ​នៅ​ទឹកដី Real Betis ខណៈ​អ្នកគាំទ្រ​ម្ចាស់ផ្ទះ​បាន​លើក​ទង់ជាតិ​អ៊ុយ​ក្រែ​ន​នៅ​ក្នុង​កីឡដ្ឋាន​។ ​ចំណែក​ឯ​កីឡាករ​អ៊ុយ​ក្រែ​ន​ខ្សែ​ការពារ Manchester City, Oleksandr Zinchenko បាន​បង្ហោះ​នៅ​លើ​បណ្តាញ​សង្គម​ពី​ការ​គាំទ្រ​ប្រទេស​របស់​ខ្លួន​។​

​​ជាមួយគ្នា​នោះ​ដែរ មុន​ការប្រកួត​ដែល Barcelona យកឈ្នះ​នៅ​ទឹកដី Napoli យប់មិញ កីឡាករ​ក្រុម​ទាំងពីរ​បាន​ឈរ​រួមគ្នា​លើកស្លា​ក “STOP WAR”​។ ​មិនទាន់​អស់​នៅឡើយ អ្នកគាំទ្រ​ក្លិប​ក្រូ​អាស៊ី Dinamo Zagreb បាន​លើក​ស្លាក​ពី​ការ​គាំទ្រ​ប្រជាជន​អ៊ុយ​ក្រែ​ន​ក្នុង​កីឡដ្ឋាន​អំឡុង​ជ័យជំនះ ១-០ លើ Sevilla​។​ ​ក្លិប​ឆេ​ក Slavia Prague បាន​ពាក់អាវ​អ៊ុយ​ក្រែ​ន​មុន​ការប្រកួត​ទល់នឹង​ក្លិប​ទួ​រគី Fenerbahce ក្រប​ខណ្ឌ Europa Conference League យប់មិញ និង​បាន​ផ្តល់​កាតព្វកិច្ច​ប្រធាន​ក្រុម​ទៅ​ខ្សែ​ការពារ​អ៊ុយ​ក្រែ​ន Taras Kacharaba ផងដែរ​៕

​អត្ថបទ​៖​នាង សុភា​វុ​ធ