ជនភៀសខ្លួនកុងហ្គោរាប់រយនាក់ កំពុងសម្រុកចូលប្រទេសប៊ូរុនឌី ដោយភៀសខ្លួនចេញពីការប្រយុទ្ធគ្នាជាថ្មី បន្ទាប់ពីក្រុមឧទ្ទាមM23 ដែលគាំទ្រដោយប្រទេសរ៉្វាន់ដា បានពង្រឹងការគ្រប់គ្រងលើទីក្រុងយុទ្ធសាស្ត្រ Uvira នៅភាគខាងកើតសាធារណរដ្ឋប្រជាធិបតេយ្យកុងហ្គោ ដែលមានបុគ្គលិកជំនួយ និងអាជ្ញាធរតំបន់យ៉ាងច្រើន។

នគរបាលប្រដាប់អាវុធ បានឈរយាមនៅជំរំ Gatumba ខណៈគ្រួសារជាច្រើនមើលទៅក្នុងស្ថានភាពហត់នឿយបន្ទាប់ពីធ្វើដំណើរជាច្រើនថ្ងៃដើម្បីគេចចេញពីអំពើហិង្សា។

ជនភៀសខ្លួននៅជំរំបណ្តោះអាសន្ន Gatumba បាននិយាយថា «ពុំមានដំណើរការដើម្បីទទួលបានទឹកទទួលទាន ឬបង្គន់អនាម័យទេ។ ស្ថានភាពយ៉ាប់យ៉ឺនខ្លាំង។ នេះគឺជាមហន្តរាយ ហើយជីវិតមនុស្សនៅតែស្ថិតក្នុងហានិភ័យ»។

ការដួលរលំទីក្រុង Uvira គឺជាការកើនឡើងគួរឱ្យកត់សម្គាល់សម្រាប់ក្រុមឧទ្ទាម M23 និងបានបង្កឱ្យមានការព្រួយបារម្ភពីអំពើហិង្សាឡើងវិញដែលរាលដាលបន្ថែមទៀតនៅភាគខាងត្បូងតាមបណ្តោយបឹង Tanganyika។ កាលពីថ្ងៃព្រហស្បតិ៍ សំឡេងបាញ់កាំភ្លើងមិនឈប់ឈរត្រូវបានលាន់លឺនៅជាយក្រុង Uvira ខណៈគ្រួសារជាច្រើនបន្តសម្រុកឆ្លងកាត់ព្រំដែន។ ទីភ្នាក់ងារជំនួយ បានព្រមានអំពីគ្រាអាសន្នមនុស្សធម៌កាន់តែខ្លាំងឡើង ខណៈទីជម្រកស្នាក់នៅពេញហៀរ ហើយការផ្គត់ផ្គង់អាហារមានកាន់តែតិច។