លំនៅឋាននិងអាជីវកម្មប្រហែល១,៥លានខ្នងគ្មានអគ្គិសនីប្រើប្រាស់កាលពីថ្ងៃព្រហស្បតិ៍ ទី១១ ខែធ្នូ បន្ទាប់ពីព្យុះស៊ីក្លូនដ៏ធំបានវាយបោកបក់កាត់តំបន់ទីប្រជុំជននៃទីក្រុងសៅប៉ូឡូ(Sao Paulo) ដោយផ្តួលរំលំដើមឈើ និងបណ្តាញអគ្គិសនី រំខានដល់ជើងហោះហើរ និងការផ្គត់ផ្គង់ទឹក។

ក្រុមហ៊ុនថាមពលអគ្គិសនី Enel បាននិយាយថា ខ្យល់បក់ខ្លាំងរហូតដល់៩៨គីឡូម៉ែត្រក្នុងមួយម៉ោង បានវាយប្រហារតំបន់នេះដោយផលប៉ះពាល់បានបន្តរហូតដល់ថ្ងៃព្រហស្បតិ៍នៅទូទាំងទីក្រុងដែលមានប្រជាជនចំនួន១១,៥លាននាក់។

ក្រុមហ៊ុន Enel បាននិយាយនៅក្នុងសេចក្តីថ្លែងការណ៍កាលពីថ្ងៃព្រហស្បតិ៍ថា អតិថិជនប្រហែល២ លាននាក់នៅក្នុងតំបន់បានដាច់ចន្តរអគ្គិសនីក្នុងអំឡុងពេលព្យុះខ្លាំងបំផុត ហើយសេវាកម្មនានាត្រូវបានស្តារឡើងវិញមួយចំនួន។

ក្រុមហ៊ុនផ្គត់ផ្គង់ទឹក Sabesp បានព្រមានថា ការដាច់ចរន្តអគ្គិសនីបានប៉ះពាល់ដល់ការបូមទឹករបស់ខ្លួន ដែលប៉ះពាល់ដល់សង្កាត់នានានៅទូទាំងតំបន់។ ការធ្វើដំណើរតាមផ្លូវអាកាសក៏ប្រឈមនឹងការរំខានផងដែរ ខណៈប្រតិបត្តិករអាកាសយានដ្ឋាន Aena បាននិយាយថា អាកាសយានដ្ឋាន Congonhas របស់ទីក្រុង Sao Paulo ដែលទទួលជើងហោះហើរក្នុងស្រុក បានបើកដំណើរការកាលពីថ្ងៃព្រហស្បតិ៍ ប៉ុន្តែបានលុបចោលជើងហោះហើរមកដល់ចំនួន៣១វ៉ុល និងជើងហោះហើរចេញដំណើរចំនួន១៥វ៉ុល បន្ទាប់ពីលុបចោលជើងហោះហើរចំនួន ១៨១ កាលពីថ្ងៃពុធ។