សមាជិកសភាបក្សប្រជាធិបតេយ្យជាច្រើនរូបកាលពីថ្ងៃព្រហស្បតិ៍ បានអំពាវនាវឲ្យរដ្ឋាភិបាលអ៊ីស្រាអែល និងសហរដ្ឋអាមេរិកស៊ើបអង្កេតឲ្យបានពេញលេញនូវការវាយប្រហារដ៏សាហាវមួយ នៅឆ្នាំ ២០២៣ ដោយយោធាអ៊ីស្រាអែលលើអ្នកយកព័ត៌មាន នៅភាគខាងត្បូងប្រទេសលីបង់។

ការវាយប្រហារតាមអាកាសនៅថ្ងៃទី ១៣ ខែតុលា ឆ្នាំ ២០២៣ បានសម្លាប់អ្នកថតវីដេអូរបស់សារព័ត៌មានរ៉យទ័រ គឺ លោកIssam Abdallah និងបង្កឲ្យអ្នកយកព័ត៌មានចំនួន ៦នាក់ ផ្សេងទៀត រងរបួស ក្នុងនោះពីរនាក់មកពីកាសែតAFP អ្នកកាសែតវីដេអូ លោក Dylan Collins និងអ្នកថតរូប អ្នកស្រី Christina Assi ដែលបានបាត់បង់ជើងម្ខាងរបស់ខ្លួន។

សមាជិកព្រឹទ្ធសភា Peter Welch បានប្រាប់សន្និសីទសារព័ត៌មានមួយ ដោយមានលោក Collins នៅក្បែរលោកថា៖«យើងរំពឹងថា រដ្ឋាភិបាលអ៊ីស្រាអែលនឹងធ្វើការស៊ើបអង្កេតដែលបំពេញតាមស្តង់ដាអន្តរជាតិ និងចាប់ឲ្យអ្នកដែលបានធ្វើបែបនេះ ទទួលខុសត្រូវ។

សមាជិកសភាពីរដ្ឋ Vermont ដែលជាស្រុកកំណើតរបស់លោក Collins បាននិយាយថា លោកបានជំរុញឲ្យមានចម្លើយអស់រយៈពេលពីរឆ្នាំមកហើយ ដំបូងពីរដ្ឋបាលរបស់អតីតប្រធានាធិបតីប្រជាធិបតេយ្យ       ចូ បៃដិន (Joe Biden) និងឥឡូវនេះពីរដ្ឋបាលរបស់ប្រធានាធិបតីនៃបក្សសាធារណរដ្ឋលោក ដូណាល់ ត្រាំ ( Donald Trump)៕