ទិន្នន័យរបស់រដ្ឋាភិបាល ដែលត្រូវបានពន្យារពេលចេញផ្សាយ បានបង្ហាញកាលពីថ្ងៃព្រហស្បតិ៍ (ទី១១ ខែធ្នូ) ថា ក្នុងខែកញ្ញា ឱនភាពពាណិជ្ជកម្មរបស់សហរដ្ឋអាមេរិក បានធ្លាក់ចុះខ្លាំងគួរឲ្យភ្ញាក់ផ្អើលដល់កម្រិតតូចបំផុត គិតចាប់តាំងពីឆ្នាំ២០២០ ដោយការនាំចូលកើនឡើងបន្តិច ខណៈដែលអត្រាពន្ធថ្មីរបស់លោកប្រធានាធិបតី Donald Trump បានចាប់ផ្ដើមចូលជាធរមាន។

ឱនភាពពាណិជ្ជកម្មរួម បានធ្លាក់ចុះ ១០,៩ភាគរយ ពោលគឺមកនៅត្រឹម ៥២,៨ពាន់លានដុល្លារ ដែលជាកម្រិតទាបបំផុត គិតចាប់តាំងពីពាក់កណ្តាលឆ្នាំ២០២០ ក្នុងអំឡុងពេលមានជំងឺរាតត្បាតកូវីដ-១៩។ ក្រសួងពាណិជ្ជកម្ម បានឲ្យដឹងថា ការនាំចេញបានហក់ឡើង ៣,០ភាគរយ ដល់ចំនួន ២៨៩,៣ពាន់លានដុល្លារ ខណៈដែលការនាំចូលកើនឡើង ០,៦ភាគរយ ដល់កម្រិត ៣៤២,១ពាន់លានដុល្លារ។

គួរបញ្ជាក់ថា តួលេខពាណិជ្ជកម្មនេះ គឺជារបាយការណ៍ចុងក្រោយបង្អស់នៃរបាយការណ៍សេដ្ឋកិច្ចផ្លូវការ ដែលត្រូវបានពន្យារពេលដោយសារតែការបិទរដ្ឋាភិបាលរយៈពេលវែង ចន្លោះខែតុលា ដល់ពាក់កណ្តាលខែវិច្ឆិកា។

ការផ្អាកនោះ បានធ្វើឲ្យមន្ត្រី និងក្រុមហ៊ុនស្វែងរកគោលនយោបាយ និងការសម្រេចចិត្តលើអាជីវកម្ម ដោយគ្មានសូចនាករសំខាន់ៗ ស្តីពីស្ថានភាពនៃសេដ្ឋកិច្ចធំបំផុតរបស់ពិភពលោក។ ប៉ុន្តែឥឡូវនេះ របាយការណ៍ កំពុងតែលេចឡើងក្នុងល្បឿនយឺតយ៉ាវ។

យ៉ាងណាក្ដី តួលេខកាលពីថ្ងៃព្រហស្បតិ៍នោះ ក៏បានបង្ហាញផងដែរពីរបៀបដែលអត្រាពន្ធថ្មីរបស់លោក Trump នៅឆ្នាំនេះ បន្តផ្ដល់ផលអវិជ្ជមានដល់ពាណិជ្ជកម្ម បន្ទាប់ពីការដំឡើងយ៉ាងធ្ងន់ធ្ងរដែលផ្តោតលើដៃគូពាណិជ្ជកម្មរាប់សិប បានប៉ះពាល់ដល់ការនាំចូលរបស់ប្រទេស ក្នុងខែសីហា។

កាលពីថ្ងៃទី៧ ខែសីហា ពន្ធលើសកលលោកដ៏តឹងរ៉ឹងរបស់លោក Trump បានចូលជាធរមាន សម្រាប់ទំនិញពីប្រទេសនានា រាប់ចាប់ពីសហភាពអឺរ៉ុប រហូតដល់ប្រទេសជប៉ុន៕