មេបញ្ជាការជាន់ខ្ពស់អាមេរិក នៅឧបទ្វីបកូរ៉េ បាននិយាយថា សមយុទ្ធជាទៀងទាត់ រវាងសម្ព័ន្ធមិត្ត គឺ «ពិតជា» ចាំបាច់ ដើម្បីរក្សាសន្តិភាព និងដាក់សម្ពាធលើកូរ៉េខាងជើង បន្ទាប់ពីមន្ត្រី នៅក្នុងទីក្រុងសេអ៊ូល បានលើកឡើងពីកែសម្រួលសមយុទ្ធ ដើម្បីជួយសម្រួលដល់ការសន្ទនាជាមួយប្រទេសជិតខាងប្រដាប់ដោយអាវុធនុយក្លេអ៊ែរ។

អំឡុងសិក្ខាសាលាតាមអនឡាញមួយ កាលពីថ្ងៃព្រហស្បតិ៍ (ទី១១ ខែធ្នូ) ដោយសំដៅទៅលើឈ្មោះផ្លូវការរបស់កូរ៉េខាងជើង គឺសាធារណរដ្ឋប្រជាធិបតេយ្យប្រជាមានិតកូរ៉េ (DPRK) មេបញ្ជាការកងទ័ពអាមេរិកប្រចាំប្រទេសកូរ៉េខាងត្បូង លោកឧត្តមសេនីយ៍ Xavier Brunson បាននិយាយថា៖ «កិច្ចសហការ រវាងរុស្ស៊ី និងសាធារណរដ្ឋប្រជាធិបតេយ្យប្រជាមានិតកូរ៉េ គឺពិតប្រាកដ។ វាមិនមែនជាទំនាក់ទំនងជួយគ្នាទៅវិញទៅមកនោះឡើយ។ វាគឺជាពិតទំនាក់ទំនងពិតប្រាកដ»។

លោកឧត្តមសេនីយ៍ Brunson បានបន្ថែមថា៖ «នៅពេលណាដែលនរណាម្នាក់និយាយអំពីរឿងនេះ ខ្ញុំមិនខ្វល់ថា នរណានិយាយនោះទេ និយាយអំពីសមយុទ្ធក្នុងកម្រិតតូច ឬសមយុទ្ធខុសពីមុន ហើយពួកគេត្រូវដឹងថា មានព្រឹត្តិការណ៍នេះ ២ដង ក្នុងមួយឆ្នាំ ដែលយើងពិតជាត្រូវការការគាំទ្រគ្នាខ្លះ»។ ការលើកឡើងរបស់លោកនេះ ទំនងជាសំដៅទៅលើសមយុទ្ធជាទៀងទាត់របស់សម្ព័ន្ធមិត្តទាំង២ នៅនិទាឃរដូវ និងរដូវក្តៅ ដែលមានពាក់ព័ន្ធនឹងទាហានអាមេរិកប្រមាណជា ២៨.៥០០នាក់ ដែលឈរជើងនៅក្នុងប្រទេសកូរ៉េខាងត្បូង។

ការកត់សម្គាល់របស់លោកឧត្តមសេនីយ៍រូបនេះ ហាក់ដូចជាមានជំហរខុសពីប្រធានាធិបតីកូរ៉េខាងត្បូង លោក Lee Jae Myung ដែលបាននិយាយកាលពីមួយសប្តាហ៍មុនថា លោកបើកចំហរ ដើម្បីពិនិត្យមើលសមយុទ្ធយោធារួមគ្នារបស់ទីក្រុងសេអ៊ូលជាមួយសហរដ្ឋអាមេរិក ប្រសិនបើវានឹងជួយអាមេរិកឲ្យបន្តកិច្ចចរចាជាមួយមេដឹកនាំកូរ៉េខាងជើង លោក គីម ជុងអ៊ុន (Kim Jong Un)។ ក្រោយមក ទីប្រឹក្សាសន្តិសុខជាតិរបស់លោក Lee បាននិយាយថា ទីក្រុងសេអ៊ូលមិនកំពុងពិចារណាលើការកែសម្រួលសមយុទ្ធជាជម្រើសមួយ នាពេលនេះទេ។ តែរដ្ឋមន្ត្រីក្រសួងបង្រួបបង្រួម លោក Chung Dong-young បានប្រាប់អ្នកសារព័ត៌មាននៅសប្តាហ៍នេះថា ពួកគេគួរតែអាចពិភាក្សា អំពីបញ្ហានេះ ដើម្បីចាប់ផ្តើមការចរចាជាមួយទីក្រុងព្យុងយ៉ាង៕