សហរដ្ឋអាមេរិក កាលពីថ្ងៃព្រហស្បតិ៍ (ទី១១ ខែធ្នូ) បានប្រកាសកិច្ចព្រមព្រៀងជាមួយសម្ព័ន្ធមិត្ត ដើម្បីធានាដល់ខ្សែច្រវាក់ផ្គត់ផ្គង់រ៉ែ ដែលត្រូវការចាំបាច់ សម្រាប់បញ្ញាសិប្បនិម្មិត (AI) ដោយសង្ឃឹមថា នឹងធានាឲ្យបានធនធានដ៏សំខាន់ នៅពេលដែលប្រទេសចិន នាំមុខយ៉ាងឆាប់រហ័ស។

សហរដ្ឋអាមេរិកបានចុះហត្ថលេខាលើកិច្ចព្រមព្រៀងមួយ ស្តីពីខ្សែច្រវាក់ផ្គត់ផ្គង់ជាមួយនឹងបណ្ដាប្រទេសជាសម្ព័ន្ធមិត្តសំខាន់ៗ នៅតំបន់អាស៊ី-ប៉ាស៊ីហ្វិក ដែលមានក្ដីបារម្ភ អំពីការកើនឡើងនូវឥទ្ធិពលរបស់ចិន ដោយមានជប៉ុន កូរ៉េខាងត្បូង សិង្ហបុរី និងអូស្ត្រាលី ព្រមទាំងអ៊ីស្រាអែលផងដែរ។

ដោយត្រូវបានដាក់ឈ្មោះថា Pax Silica ដែលសម្របតាមពាក្យឡាតាំង សម្រាប់សន្តិភាព និងស៊ីលីកុន ដែលជាធាតុដ៏សំខាន់ នៅក្នុង AI ភាពជាដៃគូនេះមានគោលបំណងធានានូវខ្សែច្រវាក់ផ្គត់ផ្គង់ និងធានាថា ប្រទេសទាំងនោះកាត់បន្ថយការពឹងផ្អែកលើប្រទេសចិន។

សេចក្តីថ្លែងការណ៍របស់ក្រសួងការបរទេសអាមេរិក បានឲ្យដឹងថា៖ «Pax Silica គឺជាប្រភេទថ្មីមួយនៃក្រុមអន្តរជាតិ និងភាពជាដៃគូ ជាកិច្ចព្រមព្រៀងដែលបំណងបង្រួបបង្រួមបណ្ដាប្រទេសដែលជាទីតាំងរបស់ក្រុមហ៊ុនបច្ចេកវិទ្យាកម្រិតខ្ពស់បំផុតរបស់ពិភពលោក ដើម្បីឲ្យបញ្ចេញសក្តានុពលសេដ្ឋកិច្ចនៃយុគសម័យ AI ថ្មី»។

យ៉ាងណាក្ដី សហរដ្ឋអាមេរិក ដែលបាននិយាយថា ប្រទេសផ្សេងទៀត នឹងចូលរួម មានភាពមិនច្បាស់លាស់លើការអនុវត្ត ប៉ុន្តែបានបញ្ជាក់ថា ប្រទេសនានានឹងធ្វើការជាមួយគ្នា ដើម្បីធានាឲ្យបានទាន់ពេលវេលានូវខ្សែច្រវាក់ផ្គត់ផ្គង់៕