ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) និងសមភាគីរុស្ស៊ីរបស់លោក គឺលោក វ្ល៉ាឌីមៀ ពូទីន (Vladimir Putin) បានបញ្ជាក់ពីលក្ខណៈយុទ្ធសាស្ត្រនៃទំនាក់ទំនងមិត្តភាពរវាងប្រទេសទាំងពីរ។ នេះបើយោងតាមសេចក្តីថ្លែងការណ៍របស់រដ្ឋាភិបាល។

សេចក្តីថ្លែងការណ៍ដែលបានចេញផ្សាយនៅលើប៉ុស្តិ៍ Telegram របស់រដ្ឋមន្ត្រីការបរទេសវ៉េណេស៊ុយអេឡា លោក Yvan Gil Pinto បានលើកឡើងថា៖«ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ និងសមភាគីរុស្ស៊ីរបស់លោក គឺលោក វ្ល៉ាឌីមៀ ពូទីន បានធ្វើការសន្ទនាតាមទូរស័ព្ទដ៏សំខាន់មួយ កាលពីថ្ងៃព្រហស្បតិ៍ ដែលក្នុងអំឡុងពេលនោះ ប្រមុខរដ្ឋទាំងពីរ បានបញ្ជាក់ពីលក្ខណៈយុទ្ធសាស្ត្រ រឹងមាំ និង ការអភិវឌ្ឍទំនាក់ទំនងទ្វេភាគី ដោយផ្អែកលើកិច្ចសហប្រតិបត្តិការ មិត្តភាព និងការគោរពគ្នាទៅវិញទៅមក»។

សេចក្តីថ្លែងការណ៍នេះ បានកត់សម្គាល់ថា៖«លោក វ្ល៉ាឌីមៀ ពូទីន បានគាំទ្រយ៉ាងពេញទំហឹងចំពោះលោក ម៉ាឌូរ៉ូ» ក្នុងកិច្ចខិតខំប្រឹងប្រែងរបស់លោក ក្នុងការលើកកម្ពស់សន្តិភាព ស្ថិរភាពនយោបាយ ការអភិវឌ្ឍសេដ្ឋកិច្ច និងការការពារសង្គមសម្រាប់ប្រជាជនវ៉េណេស៊ុយអេឡា។ មេដឹកនាំរុស្ស៊ីរូបនេះ បានសង្កត់ធ្ងន់ជាពិសេសថា៖«ប្រជាជនវ៉េណេស៊ុយអេឡាសមនឹងទទួលបានការគោរពយ៉ាងពេញលេញក្នុងការតស៊ូស្របច្បាប់របស់ពួកគេ ដើម្បីការពារអធិបតេយ្យភាព និងឯករាជ្យភាពរបស់ពួកគេ»។ លោកក៏បានបញ្ជាក់ផងដែរថា៖«បណ្តាញទំនាក់ទំនងផ្ទាល់រវាងប្រទេសទាំងពីរ នៅតែបើកចំហជាអចិន្ត្រៃយ៍» និងបានធានាដល់ប្រទេសវ៉េណេស៊ុយអេឡាអំពីការគាំទ្ររបស់លោក «ក្នុងការតស៊ូដើម្បីការពារអធិបតេយ្យភាព ច្បាប់អន្តរជាតិ និងសន្តិភាព នៅអាមេរិកឡាទីន»។

ចំណែកលោក ម៉ាឌូរ៉ូ បានជម្រាបជូនលោកប្រធានាធិបតីរុស្ស៊ី «អំពីវឌ្ឍនភាពជាលំដាប់របស់ប្រទេសវ៉េណេស៊ុយអេឡាក្នុងការយកឈ្នះសមរភូមិ ដើម្បីសន្តិភាព» ក៏ដូចជាអំពីកំណើនសេដ្ឋកិច្ច និងស្ថិរភាពសង្គម។ មេដឹកនាំទាំងពីរក៏បានពិភាក្សាអំពីការអភិវឌ្ឍកិច្ចសហប្រតិបត្តិការជាយុទ្ធសាស្ត្រកាន់តែទូលំទូលាយនៅក្នុងវិស័យផ្សេងៗ៕