មេដឹកនាំហុងកុង នៅថ្ងៃសុក្រ (ទី១២ ខែធ្នូ) នេះ បាននិយាយថា ក្នុងរង្វង់រយៈពេល ៩ខែ ទីក្រុងនេះនឹងប្រឹងប្រែងបញ្ចប់ឲ្យបាននូវការស៊ើបអង្កេតឯករាជ្យ ចំពោះអគ្គិភ័យដែលបានឆក់យកជីវិតមនុស្សយ៉ាងតិច ១៦០នាក់ នៅក្នុងមជ្ឈមណ្ឌលហិរញ្ញវត្ថុរបស់តំបន់អាស៊ីមួយនេះ។

លោក John Lee បាននិយាយបែបនេះក្នុងរយៈពេលជាង ២សប្តាហ៍បន្ទាប់ពីអគ្គិភ័យដ៏ធំ បានឆាបឆេះយ៉ាងរហ័សនៅអគារលំនៅឋានខ្ពស់ៗចំនួន ៧ ហើយបានធ្វើឲ្យទីក្រុងនេះចាប់ផ្ដើមស្វែងរកមូលហេតុ ដែលនាំទៅដល់សោកនាដកម្មនេះ ដែលក្រៅពីបណ្ដាលឲ្យមានអ្នកស្លាប់ដ៏ច្រើនហើយនោះ ក៏បានធ្វើអ្នកស្រុករាប់ពាន់នាក់ផ្លាស់ទីលំនៅផងដែរ។

រដ្ឋបាលទីក្រុងរបស់ប្រទេសចិនមួយនេះ បានបង្កើតគណៈកម្មាធិការឯករាជ្យមួយ ដើម្បីស៊ើបអង្កេតអគ្គិភ័យដែលបានឆាបឆេះឡើងនៅតំបន់ Tai Po ជិតព្រំដែនជាមួយចិនដីគោក ហើយបានតែងតាំងលោកចៅក្រម David Lok ដែលជាប្រធានគណៈកម្មការកិច្ចការបោះឆ្នោត ឲ្យដឹកនាំស្ថាប័ននេះ។

លោក Lee បាននិយាយក្នុងសន្និសីទសារព័ត៌មានថា៖ «សមាជិកទាំងអស់ សុទ្ធតែមានឆន្ទៈយ៉ាងខ្លាំង និងស្រឡាញ់ទីក្រុងហុងកុង មានភាពក្លាហានក្នុងការទទួលខុសត្រូវ ចំពោះកិច្ចការនេះ ហើយខ្ញុំពិតជាអរគុណពួកគាត់ ខ្ញុំសូមគោរពពួកគាត់ដោយស្មោះ»។

លោក Lee បានបន្ថែមថា គណៈកម្មាធិការឯករាជ្យ នឹងត្រូវស៊ើបអង្កេតថា តើមានបញ្ហាជាប្រព័ន្ធដែរ ឬទេ នៅក្នុងរង្វង់ឧស្សាហកម្មសំណង់ ជម្លោះផលប្រយោជន៍ ការឃុបឃិតគ្នាមិនត្រឹមត្រូវ និងកំណត់ថា តើមានការដេញថ្លៃខុសច្បាប់ នៅក្នុងវិស័យនេះដែរ ឬទេ នៅពេលមានពាក់ព័ន្ធនឹងការផ្ដល់កិច្ចសន្យា។

ប្រជាពលរដ្ឋមានការខឹងសម្បា ចំពោះអគ្គិភ័យដែលប្រើពេលជិត ២ថ្ងៃ ទើបអាចពន្លត់បាន បន្ទាប់ពីបានឆាបឆេះ កាលពីថ្ងៃទី២៦ ខែវិច្ឆិកា។ អាជ្ញាធរបានប្រាប់ថា សម្ភារៈសំណង់មិនសូវមានស្តង់ដារ ដែលត្រូវបានប្រើប្រាស់ក្នុងការជួសជុលអគារខ្ពស់ទាំងនោះ គឺជាដើមហេតុចម្បងដែលបណ្ដាលឲ្យអគ្គិភ័យកើតឡើង៕