យន្តហោះចម្បាំងអ៊ីស្រាអែលបានបើកការវាយប្រហារតាមច្រកអាកាសរាប់សិបលើកនៅទូទាំងតំបន់ភាគខាងត្បូងលីបង់ដោយមានគោលដៅទីតាំងហ្វឹកហាត់របស់ក្រុមហេសបូឡា នៅក្នុងការបំពានបទឈប់បាញ់ដ៏ផុយស្រួយចុងក្រោយគេរបស់ពួកគេ ដែលបានធ្វើអន្តរាយបន្ថែមទៀតដល់បទឈប់បាញ់រយៈពេល ១ឆ្នាំ ។

យោងតាមសេចក្តីរាយការណ៍ពីទីភ្នាក់ងារព័ត៌មានរដ្ឋលីបង់ បានឲ្យដឹងថា ការវាយឆ្មក់នេះ ត្រូវចំតំបន់ភ្នំ និងជ្រលងភ្នំនៅតំបន់ Jezzine និងតំបន់ Zahrani រួមទាំងទីតាំងនៅជិតទីក្រុង al-Aaichiyehចន្លោះទីក្រុង al-Zrariyeh និងទីក្រុង Ansar ជុំវិញតំបន់ Jabal al-Rafie ហើយនិងតំបន់ជាយក្រុងជាច្រើនទៀត ។

យោធាអ៊ីស្រាអែលនិយាយថា ពួកគេបានវាយប្រហារទីតាំងដែលប្រើប្រាស់ដោយកងកម្លាំងវរជន Radwan របស់ក្រុមហេសបូឡា សម្រាប់ហ្វឹកហាត់បាញ់អាវុធ ដោយពួកគេអះអាងថា ទីតាំងទាំងនេះ ត្រូវបានប្រើប្រាស់ ដើម្បីរៀបផែនការវាយប្រហារកងម្លាំងអ៊ីស្រាអែល និងជនស៊ីវិល ។

អ្នកស្រី Zeina Khodr គឺជាអ្នកសារព័ត៌មានរបស់កាសែត Al Jazeera ធ្វើសេចក្តីរាយការណ៍ពីទីក្រុងបេរូតថា ការវាយប្រហារនេះ ចៀសវាងតំបន់មានមនុស្សរស់នៅច្រើន ។ ទីតាំងទាំងនេះ ស្ថិតនៅតំបន់ភ្នំ និងជ្រលងភ្នំ មិនមែនជាតំបន់មានមនុស្សរស់នៅនោះទេ ។

អ្នកស្រីបន្តថា ការពិតណាស់ថា កាលពីរយៈពេលប៉ុន្មានថ្ងៃមុន នៅពាក់កណ្តាលយប់អធ្រាត្រ ពួកគេបានធ្វើរឿងតែមួយ ៕