នាយកដ្ឋានឧតុនិយមម៉ាឡេស៊ី (MetMalaysia) បានឲ្យដឹងថា ភ្លៀងធ្លាក់ខ្លាំងបន្តឥតឈប់ ត្រូវបានគេរំពឹងថា នឹងធ្វើឲ្យប៉ះពាល់ដល់ប្រជាជនម៉ាឡេស៊ីរស់នៅតាមបណ្តោយឆ្នេរសមុទ្រភាគខាងកើតនៃឧបទ្វីបម៉ាឡេស៊ី និងភាគខាងលិចនៃរដ្ឋ Sarawak នាសប្តាហ៍ក្រោយ ដោយសារតែបើតាមការព្យាករ កម្លាំងខ្យល់រដូវមូសុងបក់យ៉ាងខ្លាំងភ្លាមៗ។

ទីភ្នាក់ងារនេះបានបញ្ជាក់ថា កម្លាំងខ្យល់មូសុងឡើងខ្លាំងភ្លាមៗ ត្រូវបានគេរំពឹងថា នឹងបក់លើប្រទេសម៉ាឡេស៊ី ចាប់ពីថ្ងៃទី១៤ ដល់ថ្ងៃទី១៨ ខែធ្នូ។ នៅក្នុងសេចក្តីថ្លែងការណ៍មួយ នាថ្ងៃសុក្រ (ទី១២ ខែធ្នូ) នេះ MetMalaysia បានឲ្យដឹងថា៖ «ស្ថានភាពនេះមានសក្តានុពល ក្នុងការនាំឲ្យមានភ្លៀងធ្លាក់ខ្លាំងបន្តឥតឈប់ ក៏ដូចជាខ្យល់បក់ខ្លាំង និងរលកទឹកសមុទ្រធំៗ នៅសមុទ្រចិនខាងត្បូង ក្នុងអំឡុងពេលនោះ»។

រដ្ឋដែលរងផលប៉ះពាល់ រួមមានទាំងរដ្ឋ Sarawak ផងដែរ ដែលស្ថិតក្រោមការព្រមាន អំពីការមានភ្លៀងធ្លាក់បន្តឥតដាច់ ចាប់ពីថ្ងៃទី១៣ ដល់ថ្ងៃទី១៦ ខែធ្នូ។ ជាមួយគ្នានេះ ការព្រមានអំពីភ្លៀងធ្លាក់ស្រដៀងគ្នានេះ ត្រូវបានចេញនៅរដ្ឋ Kelantan, Terengganu, Pahang និង Johor ចាប់ពីថ្ងៃទី១៤ ដល់ថ្ងៃទី១៦ ខែធ្នូ។

ជាមួយគ្នានេះ ការព្រមានអំពីខ្យល់បក់ខ្លាំង និងរលកទឹកសមុទ្រធំៗ ក៏ត្រូវបានចេញផងដែរ រហូតដល់ថ្ងៃទី១៨ ខែធ្នូ សម្រាប់ដែនទឹក នៅម្ដុំរដ្ឋចំនួន ៤ នៃឧបទ្វីបនេះ ដែលរងផលប៉ះពាល់៕