ប្រធានាធិបតីកាហ្សាក់ស្ថាន លោក Kassym-Jomart Tokaev បាននិយាយនៅថ្ងៃសុក្រ (ទី១២ ខែធ្នូ) នេះថា ប្រទេសកាហ្សាក់ស្ថានបានចូលរួមជាមួយកិច្ចព្រមព្រៀង Abraham ដើម្បីធ្វើនូវកិច្ចប្រឹងប្រែងជួយឲ្យស្ថានការណ៍មានស្ថិរភាព នៅតំបន់មជ្ឈិមបូព៌ា។

អំឡុងពេលថ្លែងទៅកាន់វេទិកាអន្តរជាតិ សម្រាប់សន្តិភាព និងទំនុកចិត្ត នៅទីក្រុង Ashgabat រដ្ឋធានីនៃប្រទេសតួកម៉េនីស្ថាន លោក Tokayev ក៏បានសង្កត់ធ្ងន់ផងដែរ លើការគាំទ្ររបស់លោក ចំពោះការបង្កើតរដ្ឋប៉ាឡេស្ទីនអធិបតេយ្យមួយ។

ការិយាល័យរបស់លោក បានដកស្រង់សម្ដីរបស់លោក ដែលបាននិយាយថា៖ «ការសម្រេចចិត្តរបស់កាហ្សាក់ស្ថាន ក្នុងការចូលរួមក្នុងកិច្ចព្រមព្រៀង Abraham ត្រូវបានជំរុញដោយសេចក្តីប្រាថ្នា ដើម្បីរួមចំណែកដ៏មានអត្ថន័យ ក្នុងការធ្វើឲ្យស្ថានការណ៍នៅក្នុងតំបន់នេះមានស្ថិរភាព។ ក្នុងពេលជាមួយគ្នានោះ កាហ្សាក់ស្ថានគាំទ្រការបង្កើតរដ្ឋប៉ាឡេស្ទីនអធិបតេយ្យ ជាកត្តាដ៏សំខាន់ ដើម្បីដោះស្រាយវិបត្តិយោធា និងនយោបាយដែលអូសបន្លាយពេលដ៏យូរ»។

គួររំលឹកថា កាហ្សាក់ស្ថាន ដែលមានទំនាក់ទំនងការទូតយូរមកហើយជាមួយអ៊ីស្រាអែល និងបានទទួលស្គាល់ប្រទេសនេះ ក្នុងឆ្នាំ១៩៩២ បានបញ្ជាក់ពីការចូលរួមក្នុងកិច្ចព្រមព្រៀង Abraham កាលពីខែវិច្ឆិកា។

Abraham គឺជាកិច្ចព្រមព្រៀងគាំទ្រដោយសហរដ្ឋអាមេរិក ដែលធ្វើឲ្យមានប្រក្រតីភាពនូវទំនាក់ទំនង រវាងអ៊ីស្រាអែល និងបណ្ដាប្រទេសកាន់សាសនាឥស្លាមភាគច្រើន ក្នុងអំឡុងពេលអាណត្តិដំបូងរបស់លោក Trump។ មុនការចូលរួមរបស់កាហ្សាក់ស្ថាននេះ ប្រទេសចំនួន ៤ បានចូលរួមក្នុងកិច្ចព្រមព្រៀងសន្តិភាពនេះ ដែលមានបារ៉ែន ម៉ារ៉ុក ស៊ូដង់ និងអេមីរ៉ាតអារ៉ាប់រួម៕