ប្រទេសចិន នៅថ្ងៃសុក្រ (ទី១២ ខែធ្នូ) នេះ បានឲ្យដឹងថា ខ្លួនបានបណ្តេញយន្តហោះ និងនាវាជាច្រើនគ្រឿងរបស់ហ្វីលីពីន នៅជិតតំបន់មានជម្លោះ ក្នុងសមុទ្រចិនខាងត្បូង ដែលជាការប្រឈមមុខដាក់គ្នាជាបន្តបន្ទាប់ នៅក្នុងផ្លូវទឹកយុទ្ធសាស្ត្រ ក្នុងរយៈពេលប៉ុន្មានឆ្នាំថ្មីៗនេះ។

ដោយមិនបានផ្តល់កាលបរិច្ឆេទ សម្រាប់ឧប្បត្តិហេតុនោះ យោធាចិនបានប្រាប់ឲ្យដឹងថា ខ្លួនបានចេញការព្រមានខ្លាំងៗ និង «បានបណ្តេញ» យន្តហោះហ្វីលីពីនដែលបាន «ចូលក្នុង» ដែនអាកាស នៅពីលើតំបន់ថ្មប៉ប្រះទឹក Scarborough Shoal។

ប្រទេសចិនអះអាងសិទ្ធស្ទើរតែទាំងស្រុងលើតំបន់ ក្នុងសមុទ្រចិនខាងត្បូង ដោយត្រួតលើតំបន់សេដ្ឋកិច្ចផ្តាច់មុខរបស់ប្រទេសប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាម។ ជម្លោះដែលមិនអាចដោះស្រាយ បានអូសបន្លាយអស់រយៈពេលជាច្រើនឆ្នាំមកហើយ ពាក់ព័ន្ធនឹងការកាន់កាប់កោះ និងភូមិសាស្ត្រផ្សេងៗ។ 

នៅក្នុងសេចក្តីថ្លែងការណ៍ដាច់ដោយឡែកមួយ ឆ្មាំល្បាតឆ្នេរសមុទ្រចិន (CCG) បានឲ្យដឹងថា នាវាហ្វីលីពីនជាច្រើនគ្រឿង បានចូលក្នុងដែនទឹក នៅជិតតំបន់ថ្មប៉ប្រះទឹក Sabina Shoal ដើម្បី «បង្កបញ្ហា និងហេតុការណ៍ផ្សេងៗ»។ CCG បានបន្ថែមថា ខ្លួនបានចាត់វិធានការគ្រប់គ្រង លើនាវាទាំងនោះ ក្នុងនោះរួមទាំងការព្រមានដោយពាក្យសម្ដី និងការបណ្តេញចេញដោយបង្ខំផងដែរ។

ស្ថានទូតហ្វីលីពីន ប្រចាំនៅទីក្រុងប៉េកាំង និងក្រសួងការបរទេស ហើយនិងក្រុមប្រឹក្សាដែនសមុទ្ររបស់ប្រទេសនេះ មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕