នៅសហគមន៍តាមដងទន្លេក្នុងរដ្ឋព្រៃជប់ភ្លៀង Para របស់ប្រទេសប្រេស៊ីល ក្មេងស្រីអាយុ ៤ឆ្នាំ Jassiane Ferreira Sarges អាចដកដង្ហើមបានស្រួលនៅផ្ទះរបស់នាង ដោយសារប្រព័ន្ធថាមពលស្រូបពន្លឺព្រះអាទិត្យថ្មីផ្តល់ថាមពលដល់ឧបករណ៍វេជ្ជសាស្រ្តដែលក្មេងស្រីពឹងផ្អែក ដើម្បីរស់រាន ។

ក្មេងស្រី Jassiane ត្រូវបានសត្វខ្យាដំរីទិច ពេលនាងមានអាយុ ១ឆ្នាំ ធ្វើឲ្យនាងមានបញ្ហាផ្លូវដង្ហើមធ្ងន់ធ្ងរ ហើយនិងពឹងផ្អែកលើបំពង់អុកស៊ីសែន ។

មកទល់នឹងពេលនេះ អ្នកស្រី Elba Rodrigues Ferreira ដែលជាម្តាយរបស់ក្មេងស្រី ធ្វើដំណើរតាមទូករយៈពេល ២០នាទី រាល់ម៉ោង ទៅកាន់ផ្ទះអ្នកជិតខាង ដើម្បីប្រើប្រាស់ម៉ាស៊ីនបឺតខ្យល់សម្អាតផ្លូវដង្ហើមកូនស្រីរបស់គាត់ ។

កម្មវិធី “ភ្លើងសម្រាប់អ្នកទាំងអស់គ្នា”របស់ប្រេស៊ីល គឺជាគំនិតផ្តួចផ្តើមមួយរបស់រដ្ឋាភិបាល ដែលបានដាក់ចេញកាលពីឆ្នាំ ២០០៣ ដើម្បីធ្វើសកលភាវូបនីយកម្មការទទួលបានអគ្គិសនីនៅតំបន់ជនបទ និងតំបន់ដាច់ស្រយាល ។ កម្មវិធីនេះ បានតភ្ជាប់រួចទៅហើយពលរដ្ឋ ៣,៨លានគ្រួសារនៅទូទាំងប្រទេស រួមទាំងពលរដ្ឋជាង ៥៧៥.០០០គ្រួសារនៅរដ្ឋ Para ។

នៅតាមតំបន់ជាច្រើនដែលពុំមានបណ្តាញចរន្តអគ្គិសនី ក្រុមអាជ្ញាធរបានដំឡើងប្រព័ន្ធស្រូបពន្លឺព្រះអាទិត្យដែលអាចផ្ទុកថាមពលនៅក្នុងអាគុយ នាំថាមពលស្អាតដល់សហគមន៍នៅតាមដងទន្លេ និងសហគមន៍ជនជាតិភាគតិច ។

សម្រាប់គ្រួសារដូចជារូបលោក Marcos Antonio ដែលជាអ្នកដាំដើម Acai នៅទីក្រុង Afua ផ្ទាំងស្រូបពន្លឺព្រះអាទិត្យ បានជំនួសម៉ាស៊ីនភ្លើងរបស់លោកដែលធ្លាប់ប្រើប្រាស់អស់ប្រាក់ច្រើន ។

ប្រទេសប្រេស៊ីល កំពុងជំរុញផងដែរកម្មវិធី Energias da Amazonia ដែលបានដាក់ឲ្យប្រើប្រាស់កាលពីឆ្នាំ ២០២៣ ដើម្បីជំនួសរោងចក្រអគ្គិសនីប្រើប្រេងម៉ាស៊ូត នៅតាមតំបន់ដាច់ស្រយាល ជាមួយនឹងប្រភពកកើតថ្មី ។ 

រដ្ឋាភិបាល មានផែនការវិនិយោគទឹកប្រាក់ប្រហែល ១លានដុល្លារ ដើម្បីធ្វើទំនើបកម្មប្រព័ន្ធថាមពលក្នុងតំបន់ កាត់បន្ថយការបំភាយឧស្ម័ន និងកាត់បន្ថយការឧបត្ថម្ភធន សម្រាប់ឥន្ធនៈហ្វូស៊ីល ៕