អង្គការទេសន្តប្រវេសន៍អន្តរជាតិ (IOM) របស់អង្គការសហប្រជាជាតិបាននិយាយកាលពីថ្ងៃសុក្រ ទី១២ ខែធ្នូថាប្រជាជនតំបន់ហ្កាហ្សាដែលភៀសខ្លួនរាប់រយពាន់នាក់ប្រឈមនឹងទឹកជន់លិចតង់និងទីជម្រករបស់ពួកគេដោយសារតែភ្លៀងធ្លាក់ខ្លាំង ហើយសម្ភារៈសម្រាប់ទីជម្រកងបាវខ្សាច់ពុំត្រូវបានអនុញ្ញាតឱ្យចូលទៅក្នុងតំបន់នោះទេ។

អាជ្ញាធរសុខាភិបាលតំបន់បាននិយាយថា ភ្លៀងធ្លាក់ខ្លាំងបានវាយបក់នៅពាសពេញតំបន់ហ្កាហ្សាកាលពីថ្ងៃព្រហស្បតិ៍ ដោយជន់លិចតង់រាប់រយដែលផ្តល់ទីជម្រកដល់គ្រួសារជាច្រើនដែលភៀសខ្លួនដោយសារសង្គ្រាមរយៈពេលពីរឆ្នាំមកនេះ និងបានបណ្តាលឲ្យកុមារម្នាក់ស្លាប់ដោយសារតែផលប៉ះពាល់នេះ។ អង្គការទេសន្តប្រវេសន៍អន្តរជាតិ(IOM) បាននិយាយថា ប្រជាជនភៀសខ្លួនជិត ៧៩៥.០០០ នាក់កំពុងប្រឈមហានិភ័យខ្ពស់នៃទឹកជំនន់ដ៏គ្រោះថ្នាក់នៅក្នុងតំបន់ទំនាប និងពេញដោយគំនរបាក់បែក ជាកន្លែងដែលគ្រួសារជាច្រើនកំពុងរស់នៅក្នុងទីជម្រកដែលគ្មានសុវត្ថិភាព។

ទីភ្នាក់ងារអង្គការសហប្រជាជាតិបាននិយាយបន្ថែមថា ការបង្ហូរទឹកនិងការគ្រប់គ្រងកាកសំណល់មិនគ្រប់គ្រាន់ក៏បានបង្កើនហានិភ័យនៃការផ្ទុះឡើងជំងឺ។ សម្ភារៈដើម្បីជួយឲ្យទីជម្រករឹងមាំដូចជាឈើ និងក្តារបន្ទះ ក៏ដូចជាបាវខ្សាច់ និងម៉ាស៊ីនបូមទឹកដើម្បីជួយទប់ទល់ទឹកជំនន់ត្រូវបានពន្យារពេលមិនឱ្យចូលទៅក្នុងតំបន់ហ្កាហ្សាដោយសារតែការរឹតត្បិតការចូលជាបន្តបន្ទាប់។

អ៊ីស្រាអែលនិយាយថា ខ្លួនកំពុងបំពេញកាតព្វកិច្ច ហើយបានចោទទីភ្នាក់ងារទាំងនោះថាគ្មានប្រសិទ្ធភាព និងបរាជ័យក្នុងការទប់ស្កាត់ការលួចជំនួយដោយក្រុមហាម៉ាស ប៉ុន្តែក្រុមនេះបានច្រានចោល។