ប្រព័ន្ធផ្សព្វផ្សាយរបស់ប្រទេសអ៊ុយក្រែនរាយការណ៍ថា ប្រធានាធិបតី លោក Volodymyr Zelenskyy បាននិយាយពី ផែនការសន្តិភាពដែលបានដាក់ចេញដោយសហរដ្ឋអាមេរិករួមមានការសម្របសម្រួលលើផ្នែកមួយចំនួននៅតំបន់ Donetsk ភាគខាងកើត។ លោកបានសង្កត់ធ្ងន់ថា ភាគីរបស់លោក អាចនឹងមិនទទួលយកកិច្ចព្រមព្រៀងនេះទេ លុះត្រាតែវា «យុត្តិធម៌»។

ប្រព័ន្ធផ្សព្វផ្សាយក្នុងស្រុកបានដកស្រង់សម្តីលោក Zelenskyy ដែលបាននិយាយថា សហរដ្ឋអាមេរិកបានស្នើឡើងនូវអ្វីដែលខ្លួនហៅថា «តំបន់សេដ្ឋកិច្ចសេរី» នៅក្នុងតំបន់។ ផែនការនេះ នឹងពាក់ព័ន្ធនឹងការដកកងទ័ពអ៊ុយក្រែន និងការធានាថាគ្មានកងកម្លាំងរុស្ស៊ីណាម្នាក់នឹងចូលទៅក្នុងតំបន់នោះ។

ទោះជាយ៉ាងណា លោក Zelenskyy មើលឃើញថានោះជាការដាក់ចេញនូវការដកទ័ពជាឯកតោភាគីលើអ៊ុយក្រែន។ លោកបានសង្កត់ធ្ងន់ថា ប្រសិនបើភាគីម្ខាងដកថយ ភាគីម្ខាងទៀតត្រូវតែធ្វើដូចគ្នា ប៉ុន្តែវានៅតែមិនច្បាស់នោះទេថាអ្នកណានឹងគ្រប់គ្រងទឹកដីនេះ។

ជំនួយការប្រធានាធិបតីរុស្ស៊ី លោក Yury Ushakov បាននិយាយអំពីបញ្ហានេះជាមួយប្រព័ន្ធផ្សព្វផ្សាយក្នុងស្រុក។ លោកបាននិយាយថា តំបន់ Donbas ភាគខាងកើត រួមទាំងទីក្រុង Donetsk នឹងនៅតែស្ថិតនៅក្រោមការគ្រប់គ្រងរបស់រុស្ស៊ី។ មន្ត្រីនៅទីក្រុងមូស្គូ មិនទាន់បានឃើញកំណែពិនិត្យឡើងវិញនៃផែនការរបស់សហរដ្ឋអាមេរិកនៅឡើយទេ។

គេហទំព័រព័ត៌មានអាមេរិក Axios បានរាយការណ៍ថា មន្ត្រីជាន់ខ្ពស់មកពីអ៊ុយក្រែន និងអឺរ៉ុប នឹងជួបគ្នានៅទីក្រុងប៉ារីស ប្រទេសបារាំង នៅថ្ងៃសៅរ៍នេះ។