ប្រទេសចិន កាលពីថ្ងៃសុក្រ (ទី១២ ខែធ្នូ) បានបង្ហាញការប្រឆាំងយ៉ាងខ្លាំងក្លា ចំពោះការដាក់ទណ្ឌកម្មរបស់សហរដ្ឋអាមេរិក បន្ទាប់ពីទីក្រុងវ៉ាស៊ីនតោន បានរឹបអូសនាវាដឹកប្រេង នៅម្ដុំឆ្នេរសមុទ្រនៃប្រទេសវ៉េណេស៊ុយអេឡា កាលពីដើមសប្តាហ៍នេះ ហើយបានប្រកាសពីការរឹតបន្តឹងលើក្រុមហ៊ុនដឹកជញ្ជូនចំនួន ៦ និងនាវាដែលពាក់ព័ន្ធ ក្នុងនោះរួមមានទាំងនាវា ១គ្រឿងដែលមានទង់តំណាងទីក្រុងហុងកុងផងដែរ។

នៅឯសន្និសីទសារព័ត៌មាន ក្នុងទីក្រុងប៉េកាំង អ្នកនាំពាក្យក្រសួងការបរទេសចិន លោក Guo Jiakun បានលើកឡើងថា ទីក្រុងប៉េកាំង «ប្រឆាំងនឹងការដាក់ទណ្ឌកម្មខុសច្បាប់ជាឯកតោភាគី និងយុត្តាធិការហួសពីដែនសមត្ថកិច្ច ដែលមិនមានមូលដ្ឋាននៅក្នុងច្បាប់អន្តរជាតិ ឬការអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិ និងការរំលោភលើនីតិវិធីដាក់ទណ្ឌកម្ម»។

កាលពីថ្ងៃព្រហស្បតិ៍ ក្រសួងរតនាគារសហរដ្ឋអាមេរិក បានឲ្យដឹងថា ខ្លួនបានដាក់ទណ្ឌកម្មថ្មីលើក្រុមហ៊ុនចំនួន ៦ និងនាវារបស់ក្រុមហ៊ុនទាំងនោះ សម្រាប់ប្រតិបត្តិការនៅក្នុងវិស័យប្រេងរបស់វ៉េណេស៊ុយអេឡា។ សេចក្តីប្រកាសនេះបានកើតឡើងបន្ទាប់មានការកត់សម្គាល់របស់ប្រធានាធិបតីអាមេរិក Donald Trump ដែលបាននិយាយកាលពីថ្ងៃពុធថា រដ្ឋបាលរបស់លោក បានរឹបអូសនាវាដឹកប្រេងនៅម្ដុំសមុទ្រវ៉េណេស៊ុយអេឡា ខណៈដែលភាពតានតឹងជាមួយរដ្ឋាភិបាលរបស់លោកប្រធានាធិបតី Nicolas Maduro នៅតែបន្តមាន។

សេចក្តីថ្លែងការណ៍របស់រតនាគារបានឲ្យដឹងទៀតថា ក្មួយប្រុស ៣នាក់របស់ភរិយាលោក Maduro គឺលោកស្រី Cilia Flores និងអ្នកជំនួញដែលមានទំនាក់ទំនងជាមួយលោក Maduro ក៏ត្រូវបានដាក់ទណ្ឌកម្មផងដែរ។

គួរបញ្ជាក់ថា អាជ្ញាធរអាមេរិកបានប្រាប់ឲ្យដឹងថា ពួកគេបានធ្វើការវាយប្រហារដែលគេដឹងថា មានចំនួន ២២លើក លើនាវាដែលត្រូវបានចោទប្រកាន់ថា ជា «ភេរវករគ្រឿងញៀន» ចាប់តាំងពីដើមខែកញ្ញា នៅក្នុងសមុទ្រការ៉ាអ៊ីប និងមហាសមុទ្រប៉ាស៊ីហ្វិកភាគខាងកើត ដោយបានបណ្ដាលឲ្យមនុស្ស ៨៧នាក់យ៉ាងតិចស្លាប់៕