ក្រុមមន្ត្រីសហរដ្ឋអាមេរិក បាននិយាយថា កងកម្លាំងសមត្ថកិច្ចជាង ៤០០នាក់ ត្រូវបានដាក់ពង្រាយនៅយប់ថ្ងៃសៅរ៍ (១៣ ធ្នូ) ខណៈនគរបាលកំពុងតាមប្រមាញ់ជនសង្ស័យក្នុងការបាញ់ប្រហារដ៏ធំនៅសកលវិទ្យាល័យ Brown ក្នុងរដ្ឋ Rhode Island របស់សហរដ្ឋអាមេរិក ដែលបានបណ្តាលឱ្យនិស្សិត ២នាក់ស្លាប់ និងមនុស្ស ៩នាក់ផ្សេងទៀត បានរងរបួស។

បរិវេណសកលវិទ្យាល័យនៅទីក្រុង Providence មួយនេះ នៅតែត្រូវបិទខ្ទប់អស់ជាច្រើនម៉ោងមកហើយ បន្ទាប់ពីជនសង្ស័យម្នាក់កាន់អាវុធ បានចូលទៅក្នុងអគារសិក្សាមួយខ្នង ជាទីដែលនិស្សិតកំពុងប្រឡង។ ផ្លូវនានាជុំវិញបរិវេណសាលា ពោរពេញដោយរថយន្តសង្គ្រោះបន្ទាន់ ជាច្រើនម៉ោងបន្ទាប់ពីការបាញ់ប្រហារ ហើយសន្តិសុខត្រូវបានរឹតបន្តឹងនៅជុំវិញក្រុង ខណៈភ្នាក់ងារអនុវត្តច្បាប់ បន្តការតាមប្រមាញ់ខ្មាន់កាំភ្លើង។

ក្រុមមន្ត្រីបាននិយាយថា ជនសង្ស័យនៅតែមិនទាន់ចាន់ខ្លួនបាន ហើយនគរបាលបន្តធ្វើការជាមួយភ្នាក់ងារនានា។ លោក Timothy O’Hara អនុប្រធាននគរបាលក្រុង Providence បាននិយាយថា ជនសង្ស័យមិនទាន់ត្រូវកំណត់អត្តសញ្ញាណនោះទេ។ ក្រុមមន្ត្រី បានចេញវីដេអូរបស់ជនសង្ស័យ ដែលជាបុរសម្នាក់ក្នុងវ័យប្រហែល ៣០ឆ្នាំ ស្លៀកពាក់ខ្មៅ និងប្រហែលជាពាក់ម៉ាស់បិទបាំងអត្តសញ្ញាណ។

លោកប្រធានាធិបតីអាមេរិក Donald Trump បានហៅហេតុការណ៍នេះថា "គួរឱ្យរន្ធត់" និងបានសម្ដែងទុក្ខសោកសម្រាប់ជនរងគ្រោះទាំងអស់ ដោយបន្តថា មន្រ្តី FBI កំពុងនៅកន្លែងកើតហេតុដើម្បីធ្វើការលើឧប្បត្តិហេតុនេះ។ លោក Daniel McKee អភិបាលរដ្ឋ Rhode Island បានប្ដេជ្ញាថា នឹងតាមចាប់ខ្មាន់កាំភ្លើងយកទៅកាត់ទោស៕