កាលពីថ្ងៃសៅរ៍ (១៣ ធ្នូ) បរិយាកាសនៃភាពភ័យខ្លាចបានគ្របដណ្ដប់នៅក្នុងទីក្រុង Uvira ជាទីក្រុងយុទ្ធសាស្ត្រមួយនៅភាគខាងកើតប្រទេសកុងហ្គោ រយៈពេលប៉ុន្មានថ្ងៃបន្ទាប់ពីក្រុងនេះបានធ្លាក់ក្នុងកណ្ដាប់ដៃក្រុមឧទ្ទាម M23 ដែលគាំទ្រដោយប្រទេសរ្វ៉ាន់ដា ខណៈការប្រយុទ្ធគ្នានៅក្នុងតំបន់ បានបន្តកើនឡើង ទោះបីជាមានកិច្ចព្រមព្រៀងសន្តិភាពក៏ដោយ។

ក្រុមឧទ្ទាម M23 និយាយថា ខ្លួនបានដណ្តើមយកទីក្រុង Uvira កាលពីដើមសប្តាហ៍នេះ បន្ទាប់ពីការវាយលុកយ៉ាងឆាប់រហ័ស ដែលបានចាប់ផ្តើមនៅដើមខែធ្នូ។ ក្រុមមន្ត្រីក្នុងតំបន់និយាយថា អំពើហិង្សាយ៉ាងឃោរឃៅនៅទីនោះ បានសម្លាប់មនុស្សជាង ៤០០នាក់ ហើយមនុស្សប្រហែល ២សែននាក់ បានរត់ភៀសខ្លួន។

កាលពីថ្ងៃសៅរ៍ដដែលនោះ ស្ថានភាពនៅក្រុង Uvira មិនទាន់វិលមករកភាពប្រក្រតីវិញនៅឡើយទេ ដោយមានភាពស្ងប់ស្ងាត់ទាំងស្រុង និងគ្មានចរាចរណ៍អ្វីទាំងអស់ ក្រៅពីរថយន្តហ្ស៊ីបយោធា ដែលធ្វើដំណើរតាមដងផ្លូវដ៏ស្ងាត់ជ្រងំ នេះបើតាមសេចក្ដីរាយការណ៍របស់សារព័ត៌មាន AP។

ការរុលទៅមុខរបស់ពួកឧទ្ទាម បានរុញច្រានជម្លោះទៅកាន់មាត់ទ្វារប្រទេសជិតខាង ប៊ូរុនឌី ដែលបានរក្សាវត្តមានកងទ័ពនៅភាគខាងកើតប្រទេសកុងហ្គោ អស់រយៈពេលជាច្រើនឆ្នាំ ដោយបង្កើនការភ័យខ្លាចនៃជម្លោះរីករាលដាលក្នុងតំបន់កាន់តែទូលំទូលាយ។ ទីភ្នាក់ងារជនភៀសខ្លួនរបស់អង្គការសហប្រជាជាតិ បានឱ្យដឹងថា ជម្លោះដ៏រ៉ាំរ៉ៃនេះបានបង្កើតវិបត្តិមនុស្សធម៌ដ៏ធំបំផុតមួយរបស់ពិភពលោក ដោយមានមនុស្សជាង ៧លាននាក់ បានជម្លៀសខ្លួនពីអំពើហិង្សា៕