នគរបាលអូស្រ្តាលី បានបញ្ជាក់នៅថ្ងៃចន្ទ (១៥ ធ្នូ) នេះថា ខ្មាន់កាំភ្លើង ២នាក់ ដែលជាជនសង្ស័យបាញ់សម្លាប់មនុស្ស ១៥នាក់ នៅឯពិធីបុណ្យជនជាតិជ្វីហ្វមួយនៅឆ្នេរ Bondi ក្នុងទីក្រុងស៊ីដនី គឺជាឪពុក និងកូនប្រុស ខណៈអូស្ត្រាលី បានចាប់ផ្តើមកាន់ទុក្ខជនរងគ្រោះនៃអំពើហិង្សាដោយកាំភ្លើងដ៏អាក្រក់បំផុតរបស់ខ្លួនក្នុងរយៈពេលជិត ៣០ឆ្នាំ។

នគរបាលបាននិយាយក្នុងសន្និសីទសារព័ត៌មាននៅថ្ងៃចន្ទនេះថា ឪពុកវ័យ ៥០ឆ្នាំ ដែលជាខ្មាន់កាំភ្លើងទីមួយ បានស្លាប់នៅកន្លែងកើតហេតុ ដែលធ្វើឱ្យចំនួនអ្នកស្លាប់សរុបក្នុងហេតុការណ៍នេះកើនឡើងដល់ ១៦នាក់ ខណៈកូនប្រុសវ័យ ២៤ឆ្នាំ ដែលជាខ្មាន់កាំភ្លើងទីពីរ ស្ថិតក្នុងស្ថានភាពធ្ងន់ធ្ងរ កំពុងសម្រាកព្យាបាលនៅមន្ទីរពេទ្យ។ ក្រុមមន្ត្រីបានហៅការបាញ់ប្រហារកាលពីថ្ងៃអាទិត្យនេះថា ជាការដាក់គោលដៅជាក់លាក់ប្រឆាំងនឹងជនជាតិជ្វីហ្វ ហើយថា ខ្មាន់កាំ្លភ្លើងមានតែ ២នាក់នេះប៉ុណ្ណោះ។

នគរបាលបន្តថា មនុស្ស ៤០នាក់ កំពុងសម្រាកព្យាបាលនៅមន្ទីរពេទ្យ បន្ទាប់ពីការវាយប្រហារ រួមទាំងមន្ត្រីនគរបាល ២នាក់ផងដែរ។ សាក្សីនិយាយថា ការវាយប្រហារនៅឆ្នេរដ៏ល្បីល្បាញនេះ មានរយៈពេលប្រហែល ១០នាទី ដោយធ្វើឱ្យមនុស្សរាប់រយនាក់រត់ទាំងភ័យស្លន់ស្លោរ។ អាជ្ញាធរនិយាយថា មនុស្សប្រហែល ១.០០០នាក់ បានចូលរួមព្រឹត្តិការណ៍ជ្វីហ្វឈ្មោះថា Hanukkah នៅឆ្នេរនោះ។

នាយករដ្ឋមន្ត្រីអូស្ត្រាលី លោក Anthony Albanese បានហៅហេតុការណ៍នេះថាជា «ពេលវេលាដ៏ខ្មៅងងឹតសម្រាប់ប្រជាជាតិអូស្រ្តាលី» ហើយថា នគរបាលនិងភ្នាក់ងារសន្តិសុខ បន្តត្រួតពិនិត្យយ៉ាងហ្មត់ចត់អំពីមូលហេតុនៅពីក្រោយការវាយប្រហារ ដែលអាក្រក់បំផុតចាប់តាំងពីឆ្នាំ១៩៩៦ មក៕