លោកប្រធានាធិបតី Volodymyr Zelenskyy បាននិយាយកាលពីថ្ងៃអាទិត្យ ១៤ ខែធ្នូ ថា អ៊ុយក្រែនបានទម្លាក់ចោលគោលបំណងរបស់ខ្លួនក្នុងការចូលរួមជាមួយសម្ព័ន្ធភាពយោធាណាតូ ជាថ្នូរនឹងការធានាសន្តិសុខរបស់លោកខាងលិច ជាការសម្របសម្រួលដើម្បីបញ្ចប់សង្គ្រាមជាមួយរុស្ស៊ី    ខណៈកិច្ចចរចាសន្តិភាពបានចាប់ផ្តើមនៅទីក្រុងប៊ែរឡាំង ប្រទេសអាល្លឺម៉ង់។

លោក Zelenskyy បានថ្លែងបែបនេះ នៅពេលលោកធ្វើដំណើរទៅកាន់រដ្ឋធានីអាល្លឺម៉ង់ ជាកន្លែងដែលលោកបានចាប់ផ្តើមជួបជាមួយលោក Steve Witkoff បេសកជនរបស់ប្រធានាធិបតីអាមេរិក Donald Trump និងលោក Jared Kushner កូនប្រសារលោក Trump ក្នុងកិច្ចខិតខំប្រឹងប្រែងដើម្បីបញ្ចប់ជម្លោះបង្ហូរឈាមបំផុតរបស់អឺរ៉ុបចាប់តាំងពីសង្គ្រាមលោកលើកទី ២។ 

ចំណាត់ការនេះក្លាយជាការផ្លាស់ប្តូរដ៏សំខាន់មួយសម្រាប់អ៊ុយក្រែន ដែលបានតស៊ូដើម្បីចូលរួមជាមួយណាតូ ជាការការពារប្រឆាំងនឹងការវាយប្រហាររបស់រុស្ស៊ី និងមានសេចក្តីប្រាថ្នាបែបនេះរួមបញ្ចូលក្នុងរដ្ឋធម្មនុញ្ញរបស់ខ្លួន។នេះក៏បំពេញតាមគោលបំណងសង្គ្រាមមួយរបស់រុស្ស៊ីដែរ ទោះបីជាទីក្រុងគីវបានប្រកាន់ខ្ជាប់យ៉ាងម៉ឺងម៉ាត់ប្រឆាំងនឹងការប្រគល់ទឹកដីទៅឱ្យទីក្រុងមូស្គូក៏ដោយ។

ប្រភពមួយនិយាយថា លោក Zelenskyy បានជួបជាមួយបេសកជនអាមេរិកក្នុងកិច្ចចរចាដែលរៀបចំដោយអធិការបតីអាល្លឺម៉ង់លោក Friedrich Merz ដែលបានធ្វើអត្ថាធិប្បាយខ្លីៗ មុនពេលចាកចេញពីភាគីទាំងពីរដើម្បីចរចា។ មេដឹកនាំអឺរ៉ុបផ្សេងទៀតក៏នឹងមកដល់ប្រទេសអាល្លឺម៉ង់សម្រាប់កិច្ចពិភាក្សានៅថ្ងៃចន្ទសប្ដាហ៍នេះផងដែរ។

លោក Vladimir Putin បានទាមទារម្តងហើយម្តងទៀតឱ្យអ៊ុយក្រែនបោះបង់ចោលមហិច្ឆតាចូលជាសមាជិកភាពណាតូរបស់ខ្លួនជាផ្លូវការ និងដកកងទ័ពប្រហែល ១០% ចេញពីតំបន់ Donbas ដែលទីក្រុងគីវនៅតែគ្រប់គ្រង។ ទីក្រុងមូស្គូក៏បាននិយាយផងដែរថា អ៊ុយក្រែនត្រូវតែជាប្រទេសអព្យាក្រឹត ហើយគ្មានកងទ័ពណាម្នាក់របស់ណាតូអាចឈរជើងនៅក្នុងប្រទេសអ៊ុយក្រែនបានទេ៕