អ្នកជំនាញសន្តិសុខរបស់សហរដ្ឋអាមេរិក មួយចំនួនបាននិយាយកាលពីថ្ងៃអាទិត្យ (១៤ ធ្នូ) ថា ការយល់ព្រមរបស់អ៊ុយក្រែន ក្នុងការលះបង់មហិច្ឆិតាសមាជិកភាពសម្ព័ន្ធយោធាណាតូ ប្រហែលជាមិនផ្លាស់ប្តូរដំណើរនៃកិច្ចចរចាសន្តិភាព បានច្រើននោះទេ។

គួរបញ្ជាក់ថា ក្នុងអំឡុងពេលចរចាជាមួយប្រេសិតអាមេរិក លើលទ្ធភាពនៃកិច្ចព្រមព្រៀងសន្តិភាពអ៊ុយក្រែន-រុស្ស៊ី កាលពីថ្ងៃអាទិត្យ លោកប្រធានាធិបតីអ៊ុយក្រែន Volodymyr Zelenskyy បានស្នើថា អ៊ុយក្រែននឹងបោះបង់ចោលសេចក្តីប្រាថ្នាចំពោះសមាជិកអង្គការណាតូ។ លោក Zelenskyy បាននិយាយថា ការធានាសន្តិសុខពីសហរដ្ឋអាមេរិក អឺរ៉ុប និងប្រទេសដទៃទៀត ជំនួសឱ្យការចូលរួមជាមួយអង្គការណាតូ គឺជាជំហានសម្របសម្រួលពីអ៊ុយក្រែន។

លោក Justin Logan នាយកផ្នែកសិក្សាគោលនយោបាយការពារជាតិ និងការបរទេសនៅវិទ្យាស្ថាន Cato របស់អាមេរិក បាននិយាយថា “រឿងនេះមិនផ្លាស់ប្តូរអ្វីទាំងអស់ ពោលគឺ ជាកិច្ចប្រឹងប្រែងដើម្បីឱ្យមើលទៅហាក់ដូចជាសមហេតុផលប៉ុណ្ណោះ”។ លោក Logan និងសាស្ត្រាចារ្យផ្នែកសិក្សាយុទ្ធសាស្ត្រនៅសាកលវិទ្យាល័យ Florida បាននិយាយថា យ៉ាងណាក៏សមាជិកភាពណាតូសម្រាប់អ៊ុយក្រែន មិនទាន់មានភាពប្រាកដនិយមយូរមកហើយ មានន័យថា ចំណុចនេះ «មិនមែនជាបញ្ហាធំឡើយ»។

លោក Brett Bruen អតីតទីប្រឹក្សាគោលនយោបាយការបរទេសក្នុងរដ្ឋបាលអតីតប្រធានាធីបតីអាមេរិក Obama និងបច្ចុប្បន្នជាប្រធានក្រុមហ៊ុនប្រឹក្សាយោបល់នៅស្ថាប័ន Global Situation Room បានហៅសម្បទានរបស់អ៊ុយក្រែននេះថា «ធំដុំ» នៅពេលដែលទីក្រុងមូស្គូ មិនធ្វើសម្បទានសំខាន់ៗណាមួយសោះ ប៉ុន្តែអ្នកជំនាញរូបនេះក៏បានចោទសួរថា តើលោក Zelenskyy នឹងទទួលបានអ្វីជាថ្នូរនឹងការដើរថយក្រោយពីពាក្យសន្យាដ៏រឹងមាំមួយចំពោះប្រជាជនអ៊ុយក្រែន បែបនេះ៕