ប្រេសិតពិសេសរបស់ប្រធានាធិបតីសហរដ្ឋអាមេរិក លោកDonald Trump គឺលោក Steve Witkoffបានបញ្ជាក់ថា គណៈប្រតិភូរបស់សហរដ្ឋអាមេរិក និងអ៊ុយក្រែនសម្រេចបាន «វឌ្ឍនភាពជាច្រើន» ក្នុងអំឡុងពេលចរចានៅរដ្ឋធានីប៊ែរឡាំង ប្រទេសអាល្លឺម៉ង់ ។

លោក Witkoff បានបញ្ជាក់នៅលើបណ្តាញសង្គម X របស់លោកថា «ក្រុមមន្ត្រីតំណាងនានាបានរៀបចំកិច្ចពិភាក្សាស៊ីជម្រៅទាក់ទងនឹងផែនការសន្តិភាព ២០ចំណុច របៀបវារៈសេដ្ឋកិច្ច និងបញ្ហាជាច្រើនទៀត»។ «វឌ្ឍនភាពជាច្រើនត្រូវបានធ្វើឡើង ហើយពួកគេនឹងជួបគ្នាម្តងទៀតនៅព្រឹកថ្ងៃចន្ទសប្ដាហ៍នេះ។

កាលពីថ្ងៃទី១៤ ខែធ្នូ ការចរចារវាងសហរដ្ឋអាមេរិក និងអ៊ុយក្រែន ទាក់ទងនឹងការដោះស្រាយជម្លោះដែលកំពុងបន្តនៅអ៊ុយក្រែន ត្រូវបានធ្វើឡើងនៅការិយាល័យអធិការបតីសហព័ន្ធក្នុងទីក្រុងប៊ែរឡាំង។

គណៈប្រតិភូសហរដ្ឋអាមេរិក ត្រូវបានតំណាងដោយលោក Witkoff និងធុរកិច្ចជនលោក Jared Kushner ដែលជាកូនប្រសាររបស់ប្រធានាធិបតីសហរដ្ឋអាមេរិក Donald Trump។

ភាគីអ៊ុយក្រែនត្រូវបានតំណាងដោយលោក Vlodimir Zelenskyy លេខាធិការក្រុមប្រឹក្សាសន្តិសុខ លោក Rustem Umerov និងប្រធានអគ្គសេនាធិការកងទ័ពអ៊ុយក្រែន លោក Andrey Gnatov។ លោក Friedrich Merz អធិការបតីអាល្លឺម៉ង់ បានចាកចេញពីបន្ទប់ប្រជុំ បន្ទាប់ពីថ្លែងសុន្ទរកថាស្វាគមន៍ខ្លី៕