អាជ្ញាធរតំបន់បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ភ្លៀងធ្លាក់ខ្លាំងនិងទឹកជំនន់ដ៏គំហុកបានបណ្តាលឲ្យមនុស្សយ៉ាងហោចណាស់១៤នាក់ស្លាប់ និងរបួស៣២នាក់ផ្សេងទៀតនៅក្នុងខេត្ត Safi ឆ្នេរសមុទ្រអាត្លង់ទិករបស់ប្រទេសម៉ារ៉ុក។

សេចក្តីថ្លែងការណ៍បាននិយាយថា ទឹកជំនន់បណ្តាលមកពីព្យុះផ្គររន្ទះដ៏ខ្លាំងក្លាដែលបានវាយប្រហារខេត្តនេះក្នុងរយៈពេលប្រហែលមួយម៉ោង បានធ្វើឲ្យជន់លិចលំនៅឋានរាប់សិបខ្នង និងអាជីវកម្មជាច្រើនកន្លែង។

យោងតាមរបាយការណ៍របស់ទីភ្នាក់ងារសារព័ត៌មានរដ្ឋ MAP បានឲ្យដឹងថាលំនៅឋាន និងអាជីវកម្មប្រហែល៧០ខ្នងនៅក្នុងខេត្ត Safi ត្រូវបានជន់លិច ខណៈយានយន្តចំនួន១០គ្រឿងត្រូវបានទឹកហូរនាំ។

ទឹកជំនន់ ក៏បានបំផ្លាញផ្លូវថ្នល់ និងបានបណ្តាលឱ្យមានការរំខានដល់ការធ្វើចរាចរណ៍យ៉ាងទូលំទូលាយ នេះបើយោងតាមសេចក្តីរាយការណ៍របស់សារព័ត៌មានMAP។

អាជ្ញាធរបាននិយាយថា កិច្ចខិតខំប្រឹងប្រែងកំពុងបន្តស្វែងរកអ្នកបាត់ខ្លួន និងស្តារឡើងវិញដំណើរការផ្លូវថ្នល់ និងសេវាសាធារណៈនៅទូទាំងខេត្ត។