លោក Chris Minns នាយករដ្ឋមន្ត្រីប្រចាំរដ្ឋ New South Wales បាននិយាយនៅថ្ងៃចន្ទ ទី១៥ ខែធ្នូនេះថា រដ្ឋនឹងពិនិត្យច្បាប់អាវុធឡើងវិញ និងការឆ្លើយតបរបស់នគរបាលបន្ទាប់ពីការបាញ់ប្រហារដ៏ធំមួយនៅឆ្នេរ Bondi នៃទីក្រុងស៊ីដនី ដែលបានបណ្តាលឱ្យមនុស្ស១៦នាក់ស្លាប់ រួមទាំងអ្នកបាញ់ប្រហារម្នាក់។

មនុស្ស៤០នាក់នៅតែសម្រាកព្យាបាលនៅមន្ទីរពេទ្យក្រោយការវាយប្រហារកាលពីថ្ងៃអាទិត្យ ទី១៤ ខែធ្នូ ដោយខ្មាន់កាំភ្លើងពីរនាក់ដែលនគរបាលបាននិយាយនៅថ្ងៃចន្ទនេះថាជាឪពុកនិងកូនប្រុស។

នគរបាលពុំបានបញ្ចេញឈ្មោះអ្នកបាញ់ប្រហារ ឬបង្ហាញថាពួកគេជាពលរដ្ឋអូស្ត្រាលីឬយ៉ាងណានោះទេ ប៉ុន្តែបាននិយាយថាឪពុកមានអាជ្ញាប័ណ្ណប្រើប្រាស់អាវុធតាំងពីឆ្នាំ២០១៥ និងមានអាវុធចំនួន៦ដើម។ លោក Minns បានប្រាប់អ្នកសារព័ត៌មានថា កំណែទម្រង់ច្បាប់ប្រើប្រាស់កាំភ្លើងកំពុងត្រូវបានពិចារណា និងសន្យាថានឹងមានការស៊ើបអង្កេតឯករាជ្យលើការបាញ់ប្រហារ និងការឆ្លើយតបក្នុងគ្រាអាសន្ន។

លោក Minns និយាយថា «យើងចង់ធ្វើឱ្យប្រាកដថា កំណែទម្រង់ និងការផ្លាស់ប្តូរនាពេលអនាគតនៅក្នុងរដ្ឋ New South Wales មានផលប៉ះពាល់យូរអង្វែង ប៉ុន្តែវាពុំមែនជាលើកចុងក្រោយដែលខ្ញុំនឹងនិយាយអំពីបញ្ហានេះទេ ហើយអ្នកអាចរំពឹងថានឹងមានចំណាត់ការឆាប់ៗនេះ»។ ការបាញ់ប្រហារទ្រង់ទ្រាយធំ កម្រកើតមានណាស់នៅក្នុងប្រទេសអូស្ត្រាលី ជាប្រទេសមួយក្នុងចំណោមប្រទេសដែលមានសុវត្ថិភាពបំផុតរបស់ពិភពលោក។ ការវាយប្រហារកាលពីថ្ងៃអាទិត្យគឺជាការវាយប្រហារដ៏អាក្រក់បំផុតចាប់តាំងពីឆ្នាំ១៩៩៦ ដែលនៅឆ្នាំនោះខ្មាន់កាំភ្លើងម្នាក់បានសម្លាប់មនុស្ស៣៥នាក់នៅតំបន់ទេសចរណ៍ Port Arthur ក្នុងរដ្ឋកោះ Tasmania ភាគខាងត្បូង។