មន្រ្តីជាន់ខ្ពស់កូឡុំប៊ី បាននិយាយកាលពីយប់ថ្ងៃអាទិត្យ (១៤ ធ្នូ) ថា មនុស្ស ១៧នាក់ បានស្លាប់ និង ២០នាក់ ផ្សេងទៀតបានរងរបួស បន្ទាប់ពីរថយន្តក្រុងមួយគ្រឿងដឹកសិស្សវិទ្យាល័យ បានធ្លាក់ពីលើច្រាំងថ្មចោទចូលក្នុងជ្រោះជ្រៅ នៅតំបន់ជនបទមួយភាគខាងជើងប្រទេសកូឡុំប៊ី។

នៅក្នុងការបង្ហោះមួយលើបណ្ដាញសង្គម X អភិបាលតំបន់ Antioquia លោក Andres Julian បាននិយាយថា រថយន្តក្រុងនេះកំពុងធ្វើដំណើរពីទីប្រជុំជន Tolu នៃតំបន់សមុទ្រការ៉ាអ៊ីប ទៅកាន់ទីក្រុង Medellin បន្ទាប់ពីដំណើរកម្មសិក្សារបស់សាលា ហើយកំពុងដឹកសិស្សមកពីវិទ្យាល័យ Antioqueño។

អាជ្ញាធរបាននិយាយថា ក្នុងចំណោមអ្នកស្លាប់ទាំងអស់ រួមមានសិស្ស ១៦នាក់ អាយុចន្លោះពី ១៦ឆ្នាំ ទៅ ១៨ឆ្នាំ ដែលទើបត្រឡប់មកពីប្រារព្ធពិធីអបអរបញ្ចប់ការសិក្សារបស់ពួកគេ ហើយជនរងគ្រោះម្នាក់ទៀតគឺជាអ្នកបើកបរ ដោយសោកនាដកម្មនេះកើតឡើងនៅពេលរថយន្តក្រុងនោះ ធ្លាក់ចូលជ្រោះជម្រៅប្រហែល ៤០ម៉ែត្រ។ អភិបាលតំបន់និយាយថា មូលហេតុនៃគ្រោះថ្នាក់នេះនៅតែស្ថិតក្រោមការស៊ើបអង្កេតនៅឡើយ៕