ក្រសួងការបរទេសអ៊ីរ៉ង់កាលពីថ្ងៃអាទិត្យបានបដិសេធការចោទប្រកាន់របស់រដ្ឋមន្ត្រីការបរទេសលីបង់ លោក Youssef Rajji ដែលថា ទីក្រុងតេអេរ៉ង់កំពុងជ្រៀតជ្រែកក្នុងកិច្ចការផ្ទៃក្នុងរបស់ទីក្រុងបេរូត ដោយចាត់ទុកទំនាក់ទំនងការទូតរបស់ប្រទេសទាំងពីរថា«មានអាយុកាលយូរលង់ណាស់មកហើយ» និងយូរអង្វែង។

អ្នកនាំពាក្យក្រសួងការបរទេសលោក Esmaeil Baghaei បានថ្លែងអំពីភាពតានតឹងក្នុងអំឡុងពេលសន្និសីទសារព័ត៌មានប្រចាំសប្តាហ៍របស់លោក នៅទីក្រុងតេអេរ៉ង់។ ការលើកឡើងនេះ បានកើតឡើងបន្ទាប់ពីការអះអាងជាសាធារណៈរបស់លោក Rajji អំពី «ការជ្រៀតជ្រែក» របស់អ៊ីរ៉ង់ និងរបាយការណ៍ប្រព័ន្ធផ្សព្វផ្សាយដែលបង្ហាញថា លោករដ្ឋមន្ត្រីលីបង់កំពុងរារាំងឯកអគ្គរដ្ឋទូតថ្មីរបស់អ៊ីរ៉ង់ពីការចូលកាន់តំណែងរបស់លោក នៅទីក្រុងបេរូត។

លោក Baghaei បាននិយាយថា ការផ្លាស់ប្តូរឯកអគ្គរដ្ឋទូត កំពុងដំណើរការជាធម្មតា ដោយកត់សម្គាល់ថា ឯកអគ្គរដ្ឋទូតលីបង់ថ្មីទើបតែចូលកាន់តំណែងរបស់លោក នៅទីក្រុងតេអេរ៉ង់។ ទាក់ទងនឹងឯកអគ្គរដ្ឋទូតអ៊ីរ៉ង់ប្រចាំទីក្រុងបេរូត លោក Baghaei បាននិយាយថា អ៊ីរ៉ង់បាន «ដាក់សំណើពាក់ព័ន្ធ និងបានបញ្ចប់នីតិវិធីចាំបាច់» ដោយបន្ថែមថា លោកសង្ឃឹមថា ដំណើរការនេះ នឹង «បន្តទៅតាមលក្ខណៈ ធម្មតារបស់វា»។

ដោយឆ្លើយតបទៅនឹងការចោទប្រកាន់របស់លោក Rajji អ្នកនាំពាក្យរូបនេះ បាននិយាយថា អ៊ីរ៉ង់បដិសេធមិនចូលរួមក្នុងវោហាសាស្ត្រដែលបង្វែរការយកចិត្តទុកដាក់ពីផលប្រយោជន៍ជាតិរបស់លីបង់។ លោកបានអះអាងថា អាទិភាពត្រូវតែជា «ការការពារប្រទេសលីបង់ប្រឆាំងនឹងឧក្រិដ្ឋកម្មដែលកំពុងបន្តរបស់អ៊ីស្រាអែល» និងការការពារអធិបតេយ្យភាពរបស់ខ្លួន។ លោក Baghaei បានជំរុញឲ្យក្រុមលីបង់ផ្តល់អាទិភាពដល់ការសន្ទនា ដើម្បីប្រឆាំងនឹង«ការត្រួតត្រារបស់អ៊ីស្រាអែល»។

ភាពតានតឹង បានផ្ទុះឡើងនៅចុងខែមុន បន្ទាប់ពីលោក Rajji បានចែករំលែកការបង្ហោះនៅលើវេទិកាប្រព័ន្ធផ្សព្វផ្សាយសង្គម X ដោយយោងទៅលើការព្រមានដែលត្រូវបានចោទប្រកាន់ពីមន្ត្រីអ៊ីរ៉ង់អំពីផលវិបាកនៃការដកហូតអាវុធរបស់ក្រុមហេសបូឡា ដែលលោកបានកំណត់ថា ជាការជ្រៀតជ្រែកពីបរទេស។ លោកបានបញ្ជាក់ជាថ្មីនូវការចោទប្រកាន់ទាំងនេះ នៅក្នុងបទសម្ភាសន៍ថ្មីៗនេះជាមួយទូរទស្សន៍ MTV Lebanon ហើយបានអញ្ជើញសមភាគីអ៊ីរ៉ង់របស់លោកគឺលោក Abbas Araghchi ឲ្យជួបប្រជុំគ្នា នៅក្នុងប្រទេសទី ៣៕