យោធាបង់ក្លាដែសបាននិយាយកាលពីថ្ងៃអាទិត្យថា កងកម្លាំងរក្សាសន្តិភាពចំនួន ៦នាក់ មកពីកងទ័ពបង់ក្លាដែស ត្រូវបានសម្លាប់ នៅក្នុងការវាយប្រហារដោយដ្រូនលើមូលដ្ឋានភស្តុភាររបស់អង្គការសហប្រជាជាតិ នៅភាគខាងត្បូងស៊ូដង់ និងមនុស្សជាច្រើននាក់ទៀត បានរងរបួសយ៉ាងធ្ងន់ធ្ងរ។ 

ការវាយប្រហារលើមូលដ្ឋានអង្គការសហប្រជាជាតិនៅក្នុងទីក្រុង Kadugli ដែលជាទីតាំងរបស់កងកម្លាំងសន្តិសុខបណ្តោះអាសន្នរបស់UN សម្រាប់តំបន់ Abyei ដែលជាតំបន់សម្បូរប្រេង និងមានភាពចលាចល ដែលមានជម្លោះរវាងស៊ូដង់ និងស៊ូដង់ខាងត្បូង បានកើតឡើង កាលពីរសៀលថ្ងៃសៅរ៍។

លោកវរសេនីយ៍ទោ Sami Ud Dowla Chowdhury នាយកផ្នែកទំនាក់ទំនងសាធារណៈអន្តរសេវាកម្មបង់ក្លាដែស ដែលជាផ្នែកប្រព័ន្ធផ្សព្វផ្សាយរបស់កងកម្លាំងប្រដាប់អាវុធបង់ក្លាដែស បានប្រាប់សារព័ត៌មាន Arab News ថា ការប្រយុទ្ធគ្នានៅក្នុងស្ថានភាពនេះ «ស្ថិតក្រោមការគ្រប់គ្រង» កាលពីថ្ងៃអាទិត្យ ប៉ុន្តែអ្នករងរបួសចំនួន ៣នាក់ មានស្ថានភាពធ្ងន់ធ្ងរ។

លោកបាននិយាយថា៖«អ្នករងរបួសកំពុងត្រូវបានផ្តល់ការថែទាំ និងការព្យាបាលកម្រិតខ្ពស់បំផុត ហើយកំពុងទទួលបានការយកចិត្តទុកដាក់ផ្នែកវេជ្ជសាស្ត្រយ៉ាងល្អបំផុត»។

យោធាបង់ក្លាដែសបានចេញផ្សាយឈ្មោះកងទ័ពដែលបានស្លាប់ និងរងរបួស។ ក្នុងចំណោមអ្នករងរបួសមានកងកម្លាំងរក្សាសន្តិភាពស្ត្រីចំនួន ៣នាក់។

ប្រទេសស៊ូដង់បានជាប់ពាក់ព័ន្ធនឹងសង្គ្រាមស៊ីវិលដ៏សាហាវមួយរវាងរដ្ឋាភិបាល ដែលទទួលស្គាល់ដោយ អន្តរជាតិដែលគ្រប់គ្រងដោយកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័ស (RSF) ដែលជាក្រុមយោធាប៉ារ៉ាដ៏មានឥទ្ធិពលមួយ ចាប់តាំងពីខែមេសា ឆ្នាំ២០២៣។ 

កងទ័ពស៊ូដង់ បានចេញសេចក្តីថ្លែងការណ៍មួយ ដែលបានបន្ទោសកងកម្លាំងគាំទ្ររហ័ស (RSF) ចំពោះការវាយប្រហារលើកងកម្លាំងរក្សាសន្តិភាពរបស់UN។ RSF បានបដិសេធការទទួលខុសត្រូវ។ នេះបើយោងតាមបណ្តាញ Telegram របស់ខ្លួន៕