បាល់ទាត់៖ ការប្រកួតបាល់ទាត់ជើងឯកយុវជនអាស៊ីអាគ្នេយ៍អាយុក្រោម ២៣ឆ្នាំ AFF U23 Championship 2022 ត្រូវបានបញ្ចប់ដោយជោគជ័យ ទោះបីមានបញ្ហាឆ្លងជំងឺកូវីដ-១៩ និងមានក្រុមមួយចំនួនបានដកខ្លួនក៏ដោយ។ នេះបើតាមការបញ្ជាក់របស់ឯកឧត្តម ខៀវ សាម៉េត ប្រធានសហព័ន្ធកីឡាបាល់ទាត់អាស៊ីអាគ្នេយ៍ និងជាអនុប្រធានសហព័ន្ធកីឡាបាល់ទាត់កម្ពុជា។
ប្រមុខសហព័ន្ធកីឡាបាល់ទាត់អាស៊ីអាគ្នេយ៍រូបនេះបានបញ្ជាក់ថា ទោះបីមានក្រុមខ្លះដកខ្លួនដូចជាមីយ៉ាន់ម៉ា និងឥណ្ឌូនេស៊ី ហើយមានករណីឆ្លងដល់មន្ដ្រី និងកីឡាករមួយចំនួន ដ្បិតមានវិធានការសុខាភិបាលតឹងរឹងយ៉ាងណា តែជារួមការប្រកួតនៅតែបន្ដដំណើរការរហូតចប់ ពោលគឺចប់ដោយជោគជ័យក្រោមការរៀបចំតាមគន្លងថ្មីនៃបរិបទកូវីដ-១៩ បន្ទាប់ពីរាជរដ្ឋាភិបាលកម្ពុជាបានបើកប្រទេសឡើងវិញ។ ក្រឡេកទៅចាប់អារម្មណ៍ការចំណាយលើការរៀបចំព្រឹត្តិការណ៍ថ្នាក់តំបន់ក្នុងសម័យកូវីដ-១៩ នេះត្រូវបានឯកឧត្តម ខៀវ សាម៉េត លើកឡើងថា ចំណាយច្រើនជាងពេលធម្មតា ៣ ទៅ ៤ដងឯណោះ ព្រោះមានក្រុមខ្លួនអត់មានជើងហោះហើរមកកម្ពុជាដូចជាឡាវ ទីម័រខាងកើត និងមីយ៉ាន់ម៉ា ដែលតម្រូវឲ្យត្រូវជួលយន្ដហោះរទៅយកក្រុមទាំងបីមកធ្វើការប្រកួត ហើយបើសរុបការចំណាយ ទាំងការធ្វើដំណើរ ស្នាក់នៅ-ហូបចុក ទាំងមន្ដ្រី និងកីឡាករទាំងអស់ រួមទាំងការរៀបចំគឺសរុបប្រហែល ២លានដុល្លារ។
សូមបញ្ជាក់ថា ការប្រកួតពានរង្វាន់ AFF U23 Championship 2022 បានចាប់ផ្ដើមការប្រកួតពីថ្ងៃទី១៤ ដល់ថ្ងៃទី២៦ ខែកុម្ភៈចុងសប្ដាហ៍មុនដោយប្រើប្រាស់ទីលាន ២ គឺពហុកីឡដ្ឋានជាតិមរតកតេជោ និងពហុកីឡដ្ឋានព្រីនស៍។ ជាលទ្ធផលក្រុមជើងឯកបានទៅក្រុម U23 វៀតណាមដែលបានឈ្នះពានលើកដំបូង បន្ទាប់ពីយកឈ្នះក្រុម U23 ថៃ ក្នុងលទ្ធផល ១-០ នៅវគ្គផ្ដាច់ព្រ័ត្រ ខណៈលេខ៣ បានទៅក្រុមទីម័រខាងកើតដោយស្វ័យប្រវត្តិ បន្ទាប់ពីជំនួបដណ្ដើមលេខ៣ ជាមួយឡាវត្រូវបានលុបចោលព្រោះបញ្ហាកូវីដ-១៩៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
