ល្បុក្កតោ៖ ឯកឧត្តម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំ យុវជន និងកីឡាបានធ្វើការកោតសរសើរ និងវាយតម្លៃខ្ពស់ចំពោះការរៀបចំ និងការវិវឌ្ឍន៍ថ្មីៗនៃកីឡាគុនល្បុក្កតោគឺជាសញ្ញាវិជ្ជមាន សម្រាប់ដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។
ការបង្ហាញសុទិដ្ឋិនិយមនេះធ្វើឡើងក្នុងពិធីបិទការប្រកួតកីឡាគុនល្បុក្កតោ ជ្រើសរើសជើងឯកថ្នាក់ជាតិប្រចាំឆ្នាំ២០២១ ក្រោយដំណើរការប្រកួតដ៏ស្វិតស្វាញរយៈពេល ៣ថ្ងៃពីថ្ងៃទី២៥ ដល់ថ្ងៃទី២៧ ខែកុម្ភៈកន្លងទៅនៅមជ្ឈមណ្ឌលជាតិហ្វឹកហ្វឺនកីឡាការ៉ាតេ ពិធីបើកការបានធ្វើឡើងក្រោមវត្តមានឯកឧត្តមបណ្ឌិតសភាចារ្យ ច័ន្ទ សារុន ប្រធានសហព័ន្ធ និងពិធីបិទធ្វើឡើងក្រោមវត្តមានឯកឧត្តម កែវ រ៉េមី អនុប្រធានសហព័ន្ធ។ ឯកឧត្តម អ៊ុក សិទ្ធិជាតិ មានប្រសាសន៍ថា គណៈកម្មការរៀបចំធ្វើបានយ៉ាងល្អប្រសើរក្នុងការរៀបចំ ទាំងការងាររដ្ឋបាល ការងារបច្ចេកទេស គឺមានការប្រែប្រួលជាវិជ្ជមាន ហើយកីឡាករ-កីឡាការិនីក៏មានសមត្ថភាព ទាំងក្បាច់គុនប្រយុទ្ធ និងសម្ដែងបានបង្ហាញនូវទេពកោសល្យ ភាពប៉ិនប្រសព្វ សេចក្ដីក្លាហាន ដែលបង្ហាញឲ្យឃើញពីវឌ្ឍនភាពសម្រាប់ត្រៀមលក្ខណៈ ឆ្ពោះទៅធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រនាឆ្នាំ២០២៣។
ទន្ទឹមជាមួយគ្នាលោក អ៊ូ តារា អគ្គលេខាធិការរងសហព័ន្ធ ក៏បានវាយតម្លៃខ្ពស់លើសមត្ថភាពកីឡាករ-កីឡាការិនី និងមន្ដ្រីបច្ចេកទេសសម្រាប់ការបំពេញកាតព្វកិច្ចក្នុងការប្រកួតឆ្នាំនេះផងដែរ ហើយលោកបានសំណូមពរឲ្យកីឡាករ-កីឡាការិនី ក៏ដូចជាមន្ដ្រីបច្ចេកទេសដើម្បីបន្ដខិតខំប្រឹងប្រែងបន្ថែមទៀត ដើម្បីឲ្យស័ក្ដិសមជាធនធានសម្រាប់ត្រៀមស៊ីហ្គេមក្នុងនាមជាម្ចាស់ផ្ទះ ក្នុងការដណ្ដើមមេដាយ និងកិត្តិយសជូនជាតិឲ្យខានតែបាន។ សូមបញ្ជាក់ថា ព្រឹត្តិការណ៍ប្រចាំឆ្នាំនេះគឺមានកីឡាករ-កីឡាការិនីចូលរួមសរុបប្រមាណ ២០០នាក់មកពី ២៨សាលាគុនដែលធ្វើការប្រកួតលើ ២១វិញ្ញាសា។ ជាលទ្ធផលសាលាគុនតារាជ ខេត្តព្រះសីហនុ ដណ្ដើមបានមេដាយច្រើនជាងគេសរុប ១០គ្រឿង (មាស៥, ប្រាក់៤ និងសំរឺទ្ធ១) ខណៈក្រសួងមហាផ្ទៃឈរលេខ២ ដណ្ដើមបានមេដាយមាស៣, ប្រាក់១ និងសំរឹទ្ធ៣ និងសាលាគុនព្រះស៊ីសុវត្ថិឈរលេខ៣ ឈ្នះមេដាយមាស៣ និងសំរឹទ្ធ១៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
