រុស្ស៊ីបាននិយាយកាលពីថ្ងៃអាទិត្យថា កងកម្លាំងរបស់ខ្លួនដណ្តើមយកបានទីតាំងលំនៅឋានមួយកន្លែងផ្សេងទៀតនៅក្នុងតំបន់ Zaporizhzhia របស់អ៊ុយក្រែន ខណៈអ៊ុយក្រែននៅថ្ងៃដដែលនេះ បានរាយការណ៍ថា បានវាយប្រហារលើរោងចក្រថាមពលរបស់រុស្ស៊ីជាច្រើនកន្លែង។ ក្រសួងការពារជាតិរុស្ស៊ី បាននិយាយនៅក្នុងរបាយការណ៍ចុងក្រោយរបស់ខ្លួនថា ក្នុងរយៈពេល២៤ម៉ោងកន្លងទៅនេះ កងកម្លាំងរុស្ស៊ីបានគ្រប់គ្រងភូមិ Varvarovka ក្នុងតំបន់ Zaporizhzhia របស់អ៊ុយក្រែន។

ក្រសួងបាននិយាយថា កងទ័ពរុស្ស៊ី បានវាយប្រហារលើហេដ្ឋារចនាសម្ព័ន្ធថាមពលនិងដឹកជញ្ជូនរបស់អ៊ុយក្រែននិងទីតាំងយានដ្រូន ព្រមទាំងទីតាំងដាក់ពង្រាយបណ្តោះអាសន្ននៃកងកម្លាំងប្រដាប់អាវុធអ៊ុយក្រែន និងទាហានស៊ីឈ្នួលបរទេសផងដែរ។ ក្រសួងបាននិយាយបន្ថែមថា យានដ្រូនអ៊ុយក្រែនសរុបចំនួន២៩០គ្រឿងត្រូវបានបាញ់ទម្លាក់ដោយភាគីរុស្ស៊ី។

កាលពីថ្ងៃអាទិត្យ នាយសេនាធិការនៃកងកម្លាំងប្រដាប់អាវុធអ៊ុយក្រែនបានរាយការណ៍ថា កងទ័ពរបស់ខ្លួនបានវាយប្រហាររោងចក្រចម្រាញ់ប្រេង Afipsky នៅក្នុងក្រុង Krasnodar Krai របស់រុស្ស៊ី ដើម្បីធ្វើឱ្យសក្តានុពលវាយលុករបស់រុស្ស៊ីចុះខ្សោយនិងរំខានដល់ការផ្គត់ផ្គង់ដឹកជញ្ជូនរបស់ប្រទេសនេះ។ 

ក្នុងការវិវឌ្ឍមួយផ្សេងទៀត សហភាពអឺរ៉ុប (EU) បានប្រកាសថា ខ្លួននឹងបង្កកទ្រព្យសកម្មរបស់រុស្ស៊ីដោយគ្មានកំណត់ ដើម្បីសម្រួលដល់ការប្រើប្រាស់មូលនិធិទាំងនោះសម្រាប់តម្រូវការហិរញ្ញវត្ថុ និងយោធារបស់អ៊ុយក្រែន។