ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី១៤ ខែធ្នូ) បានប្តេជ្ញាថា នឹងផ្ដល់ការខូចខាតយ៉ាងធ្ងន់ធ្ងរ ដល់អ្នកដែលត្រូវទទួលខុសត្រូវ ចំពោះការវាយប្រហាររបស់ក្រុម ISIS (Daesh) នៅក្នុងប្រទេសស៊ីរី ជាហេតុការណ៍ដែលបានសម្លាប់ទាហានអាមេរិក ២នាក់ និងជនស៊ីវិលម្នាក់។

លោក Trump បាននិយាយថា៖ «ខ្ញុំអាចប្រាប់អ្នកថា នៅក្នុងប្រទេសស៊ីរី នឹងមានការខូចខាតដ៏ធំកើតឡើង ចំពោះអ្នកដែលបានធ្វើវា (ការវាយប្រហារ)។ ពួកគេបានចាប់អ្នកប្រព្រឹត្តិហើយ ប៉ុន្តែវានឹងមានការខូចខាតដ៏ធំកើតឡើងមិនខាន» ។

គួរបញ្ជាក់ថា ទីបញ្ជាការកណ្តាលអាមេរិក (CENTOM) បានឲ្យដឹងថា ទាហានអាមេរិក ២នាក់ និងជនស៊ីវិលអាមេរិកម្នាក់ ត្រូវបានសម្លាប់ និងសមាជិកសេវាកម្ម ៣នាក់ បានរងរបួស កាលពីថ្ងៃសៅរ៍ នៅក្នុងការវាយប្រហារភ្លាមៗដោយខ្មាន់កាំភ្លើងរបស់ក្រុម ISIS នៅស៊ីរី។ របាយការណ៍ពីប្រព័ន្ធផ្សព្វផ្សាយ បានបង្ហាញថា បុគ្គលិកសន្តិសុខស៊ីរី ២នាក់ក៏បានរងរបួសផងដែរ។ CENTOM បានបញ្ជាក់ថា «ខ្មាន់កាំភ្លើងបានប្រយុទ្ធជាមួយកងកម្លាំង ហើយត្រូវបានសម្លាប់»។

អាជ្ញាធរស៊ីរីបានចាប់ផ្តើមប្រតិបត្តិការសន្តិសុខ កាលពីថ្ងៃអាទិត្យ ប្រឆាំងនឹងក្រុម ISIS នៅក្នុងទីជនបទនៃខេត្ត Homs បន្ទាប់ពីមានការវាយប្រហារនោះ។ កងកម្លាំងអាមេរិកប្រតិបត្តិការ នៅស៊ីរី ជាផ្នែកមួយនៃក្រុមចម្រុះអន្តរជាតិប្រឆាំងក្រុម ISIS ដែលបានបង្កើតឡើងក្នុងឆ្នាំ២០១៤។ ស៊ីរីបានចូលរួមជាមួយក្រុមចម្រុះនេះនៅថ្ងៃទី១២ ខែវិច្ឆិកា៕