ប្រមុខអង្គការសហប្រជាជាតិ (UN) កាលពីថ្ងៃអាទិត្យ (ទី១៤ ខែធ្នូ) បានថ្កោលទោសយ៉ាងខ្លាំង ចំពោះការសម្លាប់ទាហានរក្សាសន្តិភាពបង់ក្លាដែស ៦នាក់ និងធ្វើឲ្យរបួស ៨នាក់ផ្សេងទៀត នៅស៊ូដង់ភាគខាងត្បូង ដោយនិយាយថា ទង្វើទាំងនេះអាចជាឧក្រិដ្ឋកម្មសង្គ្រាម។

តាមរយៈបណ្ដាញសង្គម X លោក Antonio Guterres អគ្គលេខាធិការ UN បាននិយាយថា៖ «ខ្ញុំថ្កោលទោសយ៉ាងខ្លាំង ចំពោះការវាយប្រហារដោយយានដ្រូន ដែលកំណត់គោលដៅលើមូលដ្ឋានដឹកជញ្ជូន នៅទីក្រុង Kadugli របស់ប្រទេសស៊ូដង់ ដោយបណ្តាលឲ្យមានអ្នកស្លាប់ និងរបួស ដែលជាសមាជិកជនជាតិបង់ក្លាដែសនៃកងរក្សាសន្តិភាពរបស់ UN»។

លោកបានបន្ថែមថា៖ «ការវាយប្រហារលើកងរក្សាសន្តិភាពរបស់ UN បែបនេះ គឺមិនសមហេតុផលទាល់តែសោះ ហើយអាចក្លាយជាឧក្រិដ្ឋកម្មសង្គ្រាម។ ខ្ញុំសូមរំលឹកអ្នកគ្រប់គ្នា អំពីកាតព្វកិច្ច ក្នុងការការពារបុគ្គលិក និងជនស៊ីវិលរបស់ UN។ វានឹងត្រូវតែមានការទទួលខុសត្រូវ ចំពោះការប្រព្រឹត្តិនេះ»។

ប្រមុខរដ្ឋាភិបាលបណ្តោះអាសន្នរបស់បង់ក្លាដែស លោក Muhammad Yunus បានថ្កោលទោសការវាយប្រហារកាលពីថ្ងៃសៅរ៍ថា ជាឧក្រិដ្ឋកម្មធ្ងន់ធ្ងរ ប្រឆាំងនឹង «សន្តិភាពអន្តរជាតិ និងមនុស្សជាតិ»។ សេចក្តីថ្លែងការណ៍ផ្លូវការរបស់លោក Yunus បានលើកឡើងថា កងរក្សាសន្តិភាពបង់ក្លាដែស ៦នាក់ បានបាត់បង់ជីវិត ហើយ ៨នាក់ទៀតរងរបួស អំឡុង «ការវាយប្រហារដោយយានដ្រូន» របស់ភេរវករ លើមូលដ្ឋាន UN នៅតំបន់ Abyei ភាគខាងត្បូងប្រទេសស៊ូដង់៕