លោក Alexander Shchetinin ប្រធាននាយកដ្ឋានអាមេរិកឡាទីននៃក្រសួងការបរទេសរុស្ស៊ី បានថ្លែងនៅក្នុងពិធីបើកវេទិកាយុវជនរុស្ស៊ី-វ៉េណេស៊ុយអេឡាលើកទី៣ថា ប្រទេសវ៉េណេស៊ុយអេឡាបច្ចុប្បន្នកំពុងប្រឈមនឹងការគំរាមកំហែង និងសម្ពាធយ៉ាងច្បាស់លាស់ ហើយ រុស្ស៊ីគាំទ្រប្រជាជនរបស់ប្រទេសនេះ   ខណៈពេលដែលបញ្ជាក់ជាថ្មីនូវការគាំទ្ររបស់ខ្លួនចំពោះគោលនយោបាយរបស់មេដឹកនាំសាធារណរដ្ឋ គឺលោក នីកូឡាស ម៉ាឌូរ៉ូ។  

លោកបានកត់សម្គាល់ថា ប្រទេសវ៉េណេស៊ុយអេឡា «បច្ចុប្បន្នកំពុងស្ថិតនៅក្រោមសម្ពាធនយោបាយ និងការគំរាមកំហែងយោធាយ៉ាងច្បាស់លាស់»។

អ្នកការទូតរូបនេះ បាននិយាយថា៖«យើងបង្ហាញពីសាមគ្គីភាពរបស់យើងជាមួយប្រជាជនវ៉េណេស៊ុយអេឡា និងបញ្ជាក់ជាថ្មីនូវការគាំទ្ររបស់យើងចំពោះគោលនយោបាយរបស់រដ្ឋាភិបាលរបស់លោក នីកូឡាស ម៉ាឌូរ៉ូ ដែលមានគោលបំណងការពារផលប្រយោជន៍ជាតិ និងអធិបតេយ្យភាពរបស់ប្រទេសនេះ»។

ក្នុងន័យនេះ លោក Shchetinin បានសង្កត់ធ្ងន់ថា រុស្ស៊ី និងវ៉េណេស៊ុយអេឡា កំពុងធ្វើសកម្មភាព        «ស្របតាមកិច្ចព្រមព្រៀងភាពជាដៃគូយុទ្ធសាស្ត្រ ដែលបានចុះហត្ថលេខាដោយប្រធានាធិបតី វ្ល៉ាឌីមៀ ពូទីន និងលោក នីកូឡាស ម៉ាឌូរ៉ូ នៅថ្ងៃទី ០៧ ខែឧសភា ឆ្នាំនេះ ដែលទើបតែចូលជាធរមានថ្មីៗនេះ»។

លោកបានសន្និដ្ឋានថា៖«ចំណុចខ្លាំងរបស់ប្រជាជនមួយ គឺស្ថិតនៅលើឯកភាព និងស្មារតីនៃអត្តសញ្ញាណជាតិរបស់ពួកគេ ដែលមានទម្ងន់លើសពីភាពខុសគ្នាខាងនយោបាយ សេដ្ឋកិច្ច និងភាពខុសគ្នាផ្ទាល់ខ្លួនទាំងអស់»៕