នគរបាលជប៉ុននិយាយនៅថ្ងៃចន្ទនេះថា ពួកគេបានចាប់ខ្លួនបុរសម្នាក់ពាក់ព័ន្ធនឹងករណីវាយប្រហារដោយកាំបិតលើមនុស្ស ២នាក់ នៅមជ្ឈមណ្ឌលកម្សាន្តដែលរៀបចំការប្រគុំតន្រ្តីរបស់ក្រុមតារាចម្រៀង HKT48 ស្ថិតនៅទីក្រុងភាគខាងត្បូង Fukuoka បណ្តាលឲ្យពួកគេរងរបួសពុំគំរាមកំហែងដល់អាយុជីវិត ។

នគរបាលក្រុង Fukuokaនិយាយថា ពួកគេចាប់ខ្លួនជនសង្ស័យអាយុ ៣០ឆ្នាំម្នាក់ សម្រាប់ការ ចាក់ដោយកាំបិតចំទ្រូងបុរសវ័យ ៤៤ឆ្នាំម្នាក់ នៅមជ្ឈមណ្ឌលកម្សាន្តកាលពីថ្ងៃអាទិត្យ ។

នគរបាលនិយាយថា ពួកគេកំពុងស៊ើបអង្កេតលើករណីមួយនេះដែលអាចជាការប៉ុនប៉ងធ្វើឃាត ប៉ុន្តែពុំបានផ្តល់រឿងរ៉ាវលម្អិតបន្ថែមទៀតនោះទេ រួមទាំងមូលហេតុរបស់ជនសង្ស័យ ហើយពួកគេក៏ពុំបានធ្វើសេចក្តីអត្ថាធិប្បាយលើករណីវាយប្រហារដោយកាំបិតទី ២នោះដែរ ។

ទីភ្នាក់ងារព័ត៌មាន Kyodo និងសារព័ត៌មានជប៉ុនផ្សេងទៀត រាយការណ៍ថា បុរសរងរបួស ដែលធ្វើការនៅមហោស្រព HKT48 ស្ថិតក្នុងមជ្ឈមណ្ឌលកម្សាន្តនេះ ត្រូវបានគេដេញចាក់ ពេលដែលលោកឃើញជនសង្ស័យនៅតំបន់ហាមឃាត់ ហើយនិងនិយាយប្រាប់គាត់ឲ្យចាកចេញ ។

សេចក្តីរាយការណ៍សារព័ត៌មាន បានឲ្យដឹងថា ជនសង្ស័យម្នាក់ បានដេញចាក់ស្រ្តីវ័យ ២៧ឆ្នាំម្នាក់ផងដែរ នៅក្រោយបន្ទប់ជណ្តើរយន្ត មុនពេលរត់គេចចេញពីកន្លែងកើតហេតុ ។

មហោស្រព HKT48 និយាយថា ព្រឹត្តការណ៍ប្រគុំតន្រ្តីកាលពីយប់ថ្ងៃអាទិត្យ ត្រូវបានលុបចោល ។

សូមបញ្ជាក់ថា ឧក្រិដ្ឋកម្មហិង្សាកម្រខ្លាំងណាស់នៅប្រទេសជប៉ុន ដែលមានច្បាប់គ្រប់គ្រងអាវុធតឹងរឹង ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ មាននូវចំនួនករណីឧក្រិដ្ឋកម្មពាក់ព័ន្ធនឹងការវាយប្រហារដោយកាំបិត និងអាវុធកែឆ្នៃ ៕