គ្រូពេទ្យនៅរដ្ឋធានីញូវដែលី ប្រទេសឥណ្ឌា បាននិយាយថា សារធាតុពុលដែលរលាយក្នុងខ្យល់នៅទីក្រុងមួយនេះ អាចនឹងធ្វើឲ្យប៉ះពាល់ខ្លាំងដល់សុខភាពពលរដ្ឋ ក្រោយកម្រិតគុណភាពខ្យល់ឡើងដល់ចំណុចធ្ងន់ធ្ងរ ។

យោងតាមសេចក្តីជូនដំណឹងរបស់ក្រសួងបរិស្ថានឥណ្ឌា បានឲ្យដឹងថា គណៈកម្មការគ្រប់គ្រងគុណភាពខ្យល់ បានដាក់ចេញផែនការសកម្មភាពឆ្លើយតបចាត់ថ្នាក់ ៤ ដំណាក់កាលដែលជាផែនការកម្រិតខ្ពស់បំផុត សម្រាប់ទីក្រុងដែលី និងតំបន់ជុំវិញនោះ កាលពីល្ងាចថ្ងៃសៅរ៍ ។

គ្រូពេទ្យឯកទេសបេះដូងដែលមានមូលដ្ឋាននៅទីក្រុងដេលីនិយាយថា ភាគល្អិតតូចៗដែលអណ្តែតនៅលើអាកាស អាចបណ្តាលឲ្យមានបញ្ហាសួតធ្ងន់ធ្ងរ ហើយផលប៉ះពាល់នេះ អាចបណ្តាលឲ្យមានជំងឺវង្វេងវង្វាន់ផងដែរ ។

ទីក្រុងដែលីដែលមានមនុស្សរស់នៅ ៣០លាននាក់ តែងតែគ្របដណ្តប់ដោយផ្សែងអ័ព្ទពុល អំឡុងរដូវរងា ពេលដែលអាកាសធាតុត្រជាក់ទាក់ជាប់ខ្យល់ពីការភាយឧស្ម័នរបស់រថយន្ត ការដ្ឋានសំណង់ និងការដុតកាកសំណល់កសិកម្ម នៅរដ្ឋជិតខាង ធ្វើឲ្យកម្រិតកង្វក់បរិយាកាសកើនឡើងដល់កម្រិតមួយក្នុងចំណោមកម្រិតខ្ពស់បំផុតនៅលើពិភពលោក និងធ្វើឲ្យប្រជាពលរដ្ឋជួបហានិភ័យបញ្ហាផ្លូវដង្ហើមធ្ងន់ធ្ងរ ។

ក្រុមអាជ្ញាធរ ជំរុញឲ្យប្រជាពលរដ្ឋបន្តស្នាក់នៅក្នុងផ្ទះ ជាពិសេសកុមារ និងអ្នកដែលមានបញ្ហាផ្លូវដង្ហើម ឬជំងឺបេះដូង ហើយនិងពាក់ម៉ាស បើសិនជាពួកគេចេញក្រៅ ៕