ផ្សែងអ័ព្ទពុលដ៏ក្រាស់ឃ្មឹកបានអណ្ដែតត្រសែតពាសពេញលើរដ្ឋធានីជាតិរបស់ប្រទេសឥណ្ឌា នៅថ្ងៃចន្ទ (ទី១៥ ខែធ្នូ) នេះ ដោយធ្វើឲ្យការបំពុលបរិយាកាសឡើងដល់កម្រិតអាក្រក់បំផុត ក្នុងរយៈពេលប៉ុន្មានសប្តាហ៍នេះ ដោយរំខានដល់ការធ្វើដំណើរ និងបណ្តាលឲ្យអាជ្ញាធរដាក់ចេញនូវវិធានការទប់ស្កាត់យ៉ាងតឹងរ៉ឹងបំផុត។

ជើងហោះហើរជាង ៤០ជើង ត្រូវបានលុបចោល ហើយរាប់សិបជើងទៀត ត្រូវបានពន្យារពេល។ អាជ្ញាធរបានឲ្យដឹងថា រថភ្លើងជាង ៥០ ដែលមកដល់ និងចេញដំណើរពីទីក្រុងញ៉ូវដេលី (New Delhi) ត្រូវបានពន្យារពេលជាច្រើនម៉ោង។

អ្នកជំនាញផ្នែកថែទាំសុខភាព បានព្រមានអ្នកស្រុកឲ្យជៀសវាងរាល់ការមានសកម្មភាពក្រៅផ្ទះ ខណៈដែលមន្ទីរពេទ្យ បានរាយការណ៍ពីចំនួនអ្នកជំងឺដ៏ច្រើនភ្លាមៗ ដែលមានការពិបាកដកដង្ហើម និងរមាស់ភ្នែក។

លោក Naresh Dang គ្រូពេទ្យនៅមន្ទីរពេទ្យ Max Healthcare បាននិយាយថា៖ «ឥឡូវនេះ ទីក្រុងញ៉ូវដេលី គឺជាប្រៀបដូចជាបន្ទប់ឧស្ម័នអ៊ីចឹង។ ម៉ាស៊ីនបន្សុតខ្យល់ អាចជួយបានតែតិចតូចប៉ុណ្ណោះ ដូច្នេះ វាគឺរឿងបន្ទាន់ណាស់ដែលរដ្ឋាភិបាលត្រូវមានដំណោះស្រាយអចិន្ត្រៃយ៍មួយចំនួន»

គួរបញ្ជាក់ថា កម្រិតការបំពុលបរិយាកាសរបស់ទីក្រុងដេលី នៅតែស្ថិតក្នុងកម្រិតដែលរដ្ឋាភិបាលសហព័ន្ធចាត់ទុកថា «ធ្ងន់ធ្ងរ» សម្រាប់រយៈពេល ២ថ្ងៃចុងក្រោយនេះ ដែលរដ្ឋាភិបាលបញ្ជាក់ថា អាចបណ្តាលឲ្យមានផលប៉ះពាល់ដល់ផ្លូវដង្ហើម ចំពោះមនុស្សដែលមានសុខភាពល្អ និងប៉ះពាល់យ៉ាងធ្ងន់ធ្ងរដល់សុខភាពរបស់មនុស្សដែលមានជំងឺបេះដូង ឬសួត។

បើយោងតាមទិន្នន័យពីក្រុមប្រឹក្សាត្រួតពិនិត្យការបំពុលកណ្តាល បានឲ្យដឹងថា កាលពីថ្ងៃអាទិត្យ សន្ទទស្សន៍វាយតម្លៃផ្លូវការ មានលើសពី ៤៥០មីក្រូក្រាម ក្នុង១ម៉ែតគូបខ្យល់ នៅស្ថានីយ៍ត្រួតពិនិត្យជាច្រើន ដោយឡើងពីកម្រិត ៤៣០មីក្រូក្រាម ក្នុង១ម៉ែតគូបខ្យល់ កាលពីថ្ងៃសៅរ៍ និងឡើងខ្ពស់បំផុត រហូតមកដល់ពេលនេះ ក្នុងរដូវរងានេះ។ នៅថ្ងៃចន្ទនេះ កម្រិតពុលគឺ ៤៤៩មីក្រូក្រាម ក្នុង១ម៉ែតគូបខ្យល់៕