ប្រធានាធិបតីអ៊ុយក្រែន លោក Volodymyr Zelenskiy នឹងចាប់ផ្ដើមឡើងវិញនូវកិច្ចចរចាជាមួយបេសកជនរបស់ប្រធានាធិបតីអាមេរិក Donald Trump នៅទីក្រុងប៊ែរឡាំង ប្រទេសអាល្លឺម៉ង់ នាថ្ងៃចន្ទ (ទី១៥ ខែធ្នូ) បន្ទាប់ពីភាគីអាមេរិក បានលើកឡើងថា «វឌ្ឍនភាពជាច្រើន» បានកើតមាន ក្នុងដំណើរការឆ្ពោះទៅរកការបញ្ចប់ជម្លោះដ៏អាក្រក់បំផុតរបស់អឺរ៉ុប គិតចាប់តាំងពីសង្គ្រាមលោកលើកទី២។

លោក Zelenskiy នឹងជួបជាថ្មីម្តងទៀតជាមួយប្រេសិតអាមេរិក លោក Steve Witkoff និងកូនប្រសាររបស់ Trump គឺលោក Jared Kushner បន្ទាប់ពីមានកិច្ចពិភាក្សារយៈពេល ៥ម៉ោង កាលពីថ្ងៃអាទិត្យ ដោយបណ្ដាមេដឹកនាំអឺរ៉ុបផ្សេងទៀត ក៏បានបើកកិច្ចប្រជុំផងដែរពេញមួយថ្ងៃនោះ ក្នុងរដ្ឋធានីរបស់អាល្លឺម៉ង់។

អ៊ុយក្រែនបានលើកឡើងកាលពីថ្ងៃអាទិត្យថា ខ្លួនសុខចិត្តទម្លាក់ចោលមហិច្ឆតាចូលរួមជាមួយសម្ព័ន្ធភាពណាតូ (NATO) ជាថ្នូរនឹងការធានាសន្តិសុខរបស់លោកខាងលិច។ ប៉ុន្តែភ្លាមៗនេះ គេមិនទាន់ដឹងច្បាស់ទេថា តើការចរចាបានរីកចម្រើនដល់កម្រិតណា ឬបញ្ហាសំខាន់ៗផ្សេងទៀត ដូចជាអនាគតនៃដែនដីអ៊ុយក្រែន និងថា តើកិច្ចចរចានៅទីក្រុងប៊ែរឡាំង អាចបញ្ចុះបញ្ចូលរុស្ស៊ីឲ្យយល់ព្រមលើបទឈប់បាញ់បានកម្រិតណាដែរ។

វិមានក្រឹមឡាំងបានប្រាប់នៅថ្ងៃចន្ទនេះថា អ៊ុយក្រែនមិនចូលរួមជាមួយអង្គការណាតូ គឺជាបញ្ហាមូលដ្ឋាននៅក្នុងកិច្ចពិភាក្សា ស្តីពីលទ្ធភាពនៃការមានដំណោះស្រាយសន្តិភាព។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «តាមធម្មតា បញ្ហានេះគឺជាបញ្ហាមូលដ្ឋាន ហើយជាការពិតណាស់ វាជាប្រធានបទនៃការពិភាក្សាពិសេស»។ យ៉ាងណាក្ដី លោក Peskov បានបញ្ជាក់ថា រុស្ស៊ីរំពឹងថា នឹងមានការធ្វើបច្ចុប្បន្នភាពពីសហរដ្ឋអាមេរិកបន្ទាប់ពីមានការចរចា នៅទីក្រុងប៊ែរឡាំងនេះ៕