មន្ត្រីម្នាក់របស់ក្រុមឧទ្ទាម បានប្រាប់ឲ្យដឹងថា ក្រុម M23 ដែលគាំទ្រដោយប្រទេសរ៉្វាន់ដាមួយនេះ បានចាប់ទាហានប៊ូរុនឌីរាប់រយនាក់ ក្នុងអំឡុងពេលមានការវាយលុកចុងក្រោយបង្អស់របស់ខ្លួន នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ ខណៈដែលការប៉ះទង្គិចនៅតែបន្តកើតឡើង បើទោះបីជាមានការព្រមានពីរដ្ឋបាលរបស់លោកប្រធានាធិបអាមេរិក Donald Trump ក៏ដោយ។

កាលពីសប្តាហ៍មុន ក្រុម M23 បានវាយចូលទៅក្នុងទីក្រុងយុទ្ធសាស្ត្រ Uvira ក្បែរព្រំដែនជាមួយប្រទេសប៊ូរុនឌី ពោលគឺមិនដល់មួយសប្តាហ៍ផងបន្ទាប់ពីប្រធានាធិបតីកុងហ្គោ និងរ៉្វាន់ដា បានជួបប្រជុំនៅទីក្រុងវ៉ាស៊ីនតោនជាមួយលោក Trump ហើយបានបញ្ជាក់ពីការប្តេជ្ញាចិត្តរបស់ភាគីទាំង២ ចំពោះកិច្ចព្រមព្រៀងសន្តិភាពដែលគេស្គាល់ថា ជាកិច្ចព្រមព្រៀងវ៉ាស៊ីនតោន (Washington Accords)។

រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃសៅរ៍ចុងសប្ដាហ៍កន្លងមកថា សកម្មភាពរបស់ប្រទេសរ៉្វាន់ដា នៅភាគខាងកើតកុងហ្គោ បានរំលោភលើកិច្ចព្រមព្រៀងទីក្រុងវ៉ាស៊ីនតោន ហើយបានប្តេជ្ញាថា នឹងចាត់វិធានការ ដើម្បីធានាឲ្យបានថា ការសន្យាដែលបានធ្វើឡើង ចំពោះលោកប្រធានាធិបតីត្រូវបានរក្សា។

រ៉្វាន់ដាបដិសេធមិនបានគាំទ្រក្រុម M23 ហើយបានដាក់ការទទួលខុសត្រូវទៅលើកងកម្លាំងកុងហ្គោ និងប៊ូរុនឌី ចំពោះការប្រយុទ្ធគ្នាជាថ្មី។ របាយការណ៍នៃក្រុមអ្នកជំនាញរបស់អង្គការសហប្រជាជាតិ ដែលត្រូវបានចេញផ្សាយកាលពីខែកក្កដា បានឲ្យដឹងថា រ៉្វាន់ដាបានបញ្ជា និងគ្រប់គ្រងលើក្រុមឧទ្ទាមមួយនេះ។

អភិបាលខេត្ត South Kivu ដែលត្រូវបានតែងតាំងដោយក្រុម M23 លោក Patrick Busu Bwa Ngwi បានប្រាប់សន្និសីទសារព័ត៌មានកាលពីថ្ងៃសៅរ៍ថា៖ យើងមានទាហានប៊ូរុនឌីជាច្រើនរយនាក់នៅជាមួយពួកយើង ដែលយើងចាប់បានក្នុងអំឡុងពេលប្រយុទ្ធគ្នា ហើយយើងមានបំណងបញ្ជូនពួកគេត្រឡប់ទៅប្រទេសវិញ»។

នៅថ្ងៃចន្ទ (ទី១៥ ខែធ្នូ) នេះ មិនមានការឆ្លើយតបភ្លាមៗឡើយពីប្រទេសប៊ូរុនឌីដែលមានទាហាននៅភាគខាងកើតកុងហ្គោអស់ជាច្រើនឆ្នាំមកហើយ៕