លោក Anthony Albanese នាយករដ្ឋមន្ត្រីអូស្ត្រាលី បាននិយាយនៅថ្ងៃអង្គារ ទី១៦ ខែធ្នូនេះ ថា ឪពុកនិងកូនប្រុស ទំនងជាត្រូវបានជំរុញដោយ«មនោគមវិជ្ជារដ្ឋអ៊ីស្លាម» នៅពេលដែលពួកគេបានបើកការបាញ់ប្រហារនៅក្នុងពិធីបុណ្យជ្វីហ្វនៅឆ្នេរ Bondi នៃទីក្រុងស៊ីដនី។

លោក Sajid Akram និងកូនប្រុសរបស់លោកឈ្មោះ Naveed បានសម្លាប់មនុស្ស១៥នាក់នៅក្នុងការបាញ់ប្រហារទ្រង់ទ្រាយធំដែលកំណត់គោលដៅក្នុងការប្រារព្ធពិធី Hanukkah របស់ជ្វីហ្វ នៅឆ្នេរដ៏ល្បីល្បាញកាលពីល្ងាចថ្ងៃអាទិត្យ។

អាជ្ញាធរបានពិពណ៌នាអំពីការវាយប្រហារនេះថាជាទង្វើភេរវកម្មប្រឆាំងជ្វីហ្វ ប៉ុន្តែរហូតមកដល់ពេលនេះ បានផ្តល់ព័ត៌មានលម្អិតតិចតួចប៉ុណ្ណោះអំពីការជំរុញចិត្តឲ្យធ្វើបែបនេះ។ លោក Albanese បាននិយាយបង្ហើបដំបូងនៅថ្ងៃអង្គារនេះថា អ្នកទាំងពីរបានបង្ហាញពីចរិកជ្រុលនិយមមុនពេលប្រព្រឹត្ត «ឃាតកម្មដ៏ឃោឃៅនេះ»។

លោក Albanese និយាយថា «វាទំនងជាថា នេះត្រូវបានជំរុញដោយមនោគមវិជ្ជារដ្ឋអ៊ីស្លាម»។ «មនោគមវិជ្ជា ដែលមានអាយុកាលជាងមួយទសវត្សរ៍មកហើយ ដែលនាំឱ្យមានមនោគមវិជ្ជានៃភាពស្អប់ខ្ពើម ហើយក្នុងករណីនេះ ជាការត្រៀមខ្លួនដើម្បីសម្លាប់មនុស្សទ្រង់ទ្រាយធំ»។