រដ្ឋមន្ត្រីការបរទេសសហភាពអឺរ៉ុបកាលពីថ្ងៃចន្ទ បានបញ្ចប់កិច្ចប្រជុំក្រុមប្រឹក្សាកិច្ចការបរទេសប្រចាំឆ្នាំចុងក្រោយរបស់ខ្លួន ដោយគ្មានការឯកភាពគ្នាលើថាតើត្រូវប្រើប្រាស់ទ្រព្យសកម្មរបស់រុស្ស៊ីដែលត្រូវបានបង្កកដើម្បីផ្តល់ប្រាក់កម្ចីដល់អ៊ុយក្រែនឬយ៉ាងណា ដោយបន្សល់ទុកបញ្ហានេះមិនទាន់ត្រូវបានដោះស្រាយ មុនពេលកិច្ចពិភាក្សានាពេលខាងមុខនៅក្រុមប្រឹក្សាអឺរ៉ុប នៅចុងសប្តាហ៍នេះ។

កិច្ចប្រជុំនៅទីស្នាក់ការកណ្តាលសហភាពអឺរ៉ុបក្នុងទីក្រុងព្រុចសែល ប្រទេសបែលហ្ស៊ិក រដ្ឋមន្ត្រីការបរទេសសហភាពអឺរ៉ុប បានផ្តោតសំខាន់លើជម្លោះរុស្ស៊ី-អ៊ុយក្រែន និងស្ថានភាពនៅមជ្ឈិមបូព៌ា។ មតិសាធារណៈយល់ឃើញយ៉ាងទូលំទូលាយថា សហភាពអឺរ៉ុបកំពុងស្ថិតនៅលើផ្លូវខ្វែងភូមិសាស្ត្រនយោបាយដ៏សំខាន់មួយនៅពេលនេះ ខណៈមេដឹកនាំនៅសប្តាហ៍នេះរៀបចំធ្វើការសម្រេចចិត្តសំខាន់ៗលើដំណើរការសន្តិភាពអ៊ុយក្រែន និងការផ្តល់ហិរញ្ញប្បទានសម្រាប់អ៊ុយក្រែន។

ចំណុចកណ្តាលនៃកិច្ចពិភាក្សាគឺ ថាតើត្រូវប្រើប្រាស់ទ្រព្យសកម្មរបស់រុស្ស៊ីដែលត្រូវបានបង្កកដើម្បីផ្តល់ការគាំទ្រផ្នែកហិរញ្ញវត្ថុដោយរបៀបណា ជាសំណើមួយដែលបានបង្ហាញពីការខ្វែងគំនិតគ្នាយ៉ាងខ្លាំងនៅក្នុងប្លុកនេះ។ ប្រទេសអ៊ីតាលី ម៉ាល់តា និងប៊ុលហ្គារី បានសម្តែងការប្រឆាំងយ៉ាងច្បាស់លាស់ ខណៈប្រទេសហុងគ្រី និងស្លូវ៉ាគី បានច្រានចោលផែនការនេះទាំងស្រុង។ រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា ផែនការរបស់សហភាពអឺរ៉ុបក្នុងការប្រើប្រាស់ទ្រព្យសកម្មរបស់រុស្ស៊ីដែលត្រូវបានបង្កកស្មើនឹងទង្វើញុះញង់សង្គ្រាម ដោយព្រមានថា វានឹងអូសបន្លាយពេលជម្លោះនៅអ៊ុយក្រែន កើនឡើងហានិភ័យ និងផ្ទុយទៅនឹងផលប្រយោជន៍ជាតិរបស់ប្រទេសហុងគ្រី។