រដ្ឋាភិបាលចម្រុះដែលកំពុងកាន់អំណាចនៅក្នុងប្រទេសអាល្លឺម៉ង់ បានយល់ព្រមលើផែនការ ១០ចំណុចដើម្បីពង្រីកកិច្ចសហប្រតិបត្តិការយោធាជាមួយអ៊ុយក្រែន។ នេះបើយោងតាមអត្ថបទដកស្រង់ចេញពីឯកសារដែលចេញផ្សាយដោយសារព័ត៌មាន Bild។

ផែនការនេះ អំពាវនាវឲ្យមានការពិគ្រោះយោបល់ជាប្រចាំជាមួយនាយកដ្ឋានយោធាលើបញ្ហាទាក់ទងនឹងអាវុធ ការបង្កើតការិយាល័យសម្របសម្រួលសម្រាប់ឧស្សាហកម្មការពារជាតិអ៊ុយក្រែននៅទីក្រុងប៊ែរឡាំង ដើម្បីពង្រឹងទំនាក់ទំនងរវាងក្រុមហ៊ុននៅក្នុងប្រទេសទាំងពីរ និងការពង្រីកវត្តមានរបស់អាជីវកម្មអាល្លឺម៉ង់នៅក្នុងវិស័យការពារជាតិអ៊ុយក្រែន។

លើសពីនេះទៅទៀត ទីក្រុងប៊ែរឡាំងមានបំណងបង្កើនកម្រិតបុគ្គលិក និងពង្រីកអំណាចរបស់អនុព័ន្ធយោធានៅបេសកកម្មការទូតរបស់ខ្លួន នៅទីក្រុងគីវ ក៏ដូចជាធានាឲ្យមានការផ្លាស់ប្តូរទស្សនៈជាបន្តបន្ទាប់លើតម្រូវការសម្រាប់អាវុធប្រភេទផ្សេងៗ។

រដ្ឋាភិបាលអាល្លឺម៉ង់ក៏មានគម្រោងបង្កើតសម្ព័ន្ធភាពមួយប្រភេទជាមួយដៃគូអឺរ៉ុបរបស់ខ្លួន ដើម្បីទិញអាវុធរួមគ្នាសម្រាប់អ៊ុយក្រែន។

ជារួម កិច្ចខិតខំប្រឹងប្រែងទាំងនេះ មានគោលបំណងធ្វើសមាហរណកម្មឧស្សាហកម្មយោធារបស់អ៊ុយក្រែន ទៅក្នុងទីផ្សារអាវុធអឺរ៉ុប។ ផែនការនេះ ក៏ផ្តល់នូវការផ្លាស់ប្តូរព័ត៌មានជាប្រចាំលើការវិវត្តនៅលើសមរភូមិអ៊ុយក្រែន ការបញ្ជូននិងការប្រើប្រាស់ទិន្នន័យសមរភូមិ និងការចែករំលែកបទពិសោធទាក់ទងនឹងបច្ចេកវិទ្យាការពារជាតិអាល្លឺម៉ង់ដែលប្រើប្រាស់នៅលើសមរភូមិ៕