លោកអធិការបតី Friedrich Merz បាននិយាយថា អាល្លឺម៉ង់បានចំណាយប្រាក់ជាង ៧៥ ពាន់លានអឺរ៉ូដើម្បីគាំទ្រអ៊ុយក្រែន ចាប់តាំងពីខែកុម្ភៈ ឆ្នាំ ២០២២។ 

លោកបានថ្លែងប្រាប់វេទិកាសេដ្ឋកិច្ចអាល្លឺម៉ង់-អ៊ុយក្រែន នៅទីក្រុងប៊ែរឡាំងថា៖«ចាប់តាំងពីខែកុម្ភៈ ឆ្នាំ ២០២២ យើងបានបែងចែកប្រហែល ៤០ ពាន់លានអឺរ៉ូ ដើម្បីគាំទ្រអ៊ុយក្រែនផ្នែកយោធា។

ក្រៅពីនេះ យើងបានចំណាយប្រាក់ ៣៦ ពាន់លានអឺរ៉ូលើការគាំទ្រស៊ីវិល»។ «ហើយយើងនឹងបែងចែកជាង ១១ ពាន់លានអឺរ៉ូសម្រាប់ជំនួយយោធា នៅឆ្នាំ ២០២៦»។

យោងតាមលោក Merz បានឲ្យដឹងថា អាល្លឺម៉ង់ក៏នឹងបែងចែក ១៧០ លានអឺរ៉ូ ដើម្បីធានាការផ្គត់ផ្គង់ថាមពល នៅអ៊ុយក្រែនផងដែរ។

រដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោកស្រី Katherina Reiche បានប្រាប់វេទិកានេះមុននេះថា រដ្ឋាភិបាលអាល្លឺម៉ង់ មានគម្រោងដាក់ឲ្យដំណើរការយន្តការថ្មីមួយ ដើម្បីគាំទ្រការវិនិយោគឯកជនដល់អ៊ុយក្រែនដែលមានតម្លៃ ៤៥ លានអឺរ៉ូ៕