ព្រះមហាក្សត្រ Abdullah II នៃប្រទេសហ្ស៊កដានី និងរដ្ឋមន្ត្រីការបរទេសចិន លោក វ៉ាង យី (Wang Yi)កាលពីថ្ងៃចន្ទ បានពិភាក្សាគ្នាអំពីវិធី ដើម្បីពង្រឹងភាពជាដៃគូយុទ្ធសាស្ត្ររវាងទីក្រុងអាម៉ាន(Amman) និងទីក្រុងប៉េកាំង។

កិច្ចប្រជុំនេះ ដែលត្រូវបានចូលរួមដោយព្រះអង្គម្ចាស់រាជទាយាទ Hussein បានផ្តោតលើការបង្កើនកិច្ចសហប្រតិបត្តិការសេដ្ឋកិច្ច និងវិនិយោគ។

ដោយបែរទៅមើលការវិវត្តនៅមជ្ឈិមបូព៌ា ព្រះមហាក្សត្រ Abdullah បានអំពាវនាវឲ្យមានកិច្ចខិតខំប្រឹងប្រែងអន្តរជាតិកាន់តែច្រើន ដើម្បីដោះស្រាយវិបត្តិមនុស្សធម៌នៅតំបន់ហ្កាហ្សា ដោយបានបញ្ជាក់ពីតម្រូវការសម្រាប់កិច្ចសហប្រតិបត្តិការរវាងប្រទេសចិន និងអង្គការសប្បុរសធម៌ Hashemite ហ្ស៊កដានី។

ព្រះអង្គបានបញ្ជាក់ពីតម្រូវការក្នុងការប្រកាន់ខ្ជាប់នូវបទឈប់បាញ់នៅតំបន់ហ្កាហ្សា បញ្ឈប់ការវាយប្រហារលើប្រជាជនប៉ាឡេស្ទីន នៅតំបន់វេសបែង ហើយបានមានព្រះបន្ទូលថា ដំណោះស្រាយរដ្ឋពីរ គឺចាំបាច់សម្រាប់ការសម្រេចបាននូវសន្តិភាពយូរអង្វែង។ នេះបើយោងតាមទីភ្នាក់ងារសារព័ត៌មាន Petra។

នៅក្នុងកិច្ចប្រជុំដាច់ដោយឡែកមួយ លោក វ៉ាង បានពិភាក្សាជាមួយសមភាគីហ្ស៊កដានីរបស់លោក គឺលោក Ayman Safadi អំពីទស្សនវិស័យសម្រាប់កិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម វិនិយោគ បច្ចេកវិទ្យា និងទេសចរណ៍។

លោក Safadi និងលោក វ៉ាង បានពិភាក្សាអំពីស្ថានភាពនៅតំបន់ហ្កាហ្សា និងតំបន់វេសបែង ដោយបានបញ្ជាក់ពីតម្រូវការសម្រាប់ជំនួយមនុស្សធម៌គ្រប់គ្រាន់ និងជាបន្តបន្ទាប់ដល់តំបន់ហ្កាហ្សា។

សារព័ត៌មាន Petra បានឲ្យដឹងទៀតថា លោក Safadi បានសង្កត់ធ្ងន់លើសារៈសំខាន់នៃការបញ្ឈប់សកម្មភាពខុសច្បាប់របស់អ៊ីស្រាអែល នៅក្នុងតំបន់វេសបែង និងការរំលោភបំពាននៅក្នុងទីក្រុងហ្ស៊េរុយ   បសាឡឹម និងទីកន្លែងដ៏ពិសិដ្ឋមួយចំនួនរបស់ទីក្រុងនេះ៕