សារព័ត៌មាន Financial Times (FT) កាលពីថ្ងៃចន្ទ (ទី១៥ ខែធ្នូ) បានរាយការណ៍ថា សហរដ្ឋអាមេរិកបានផ្អាកកិច្ចព្រមព្រៀងបច្ចេកវិទ្យាដែលខ្លួនបានធ្វើជាមួយចក្រភពអង់គ្លេស កាលពីដើមឆ្នាំនេះ ជាការព្រមព្រៀងដែលមានបំណងជំរុញទំនាក់ទំនងផ្នែកបញ្ញាសិប្បនិម្មិត (AI) កុំព្យូទ័រកង់ទិច និងថាមពលនុយក្លេអ៊ែរស៊ីវិល។

សារព័ត៌មាន FT បានឲ្យដឹងថា កាលពីថ្ងៃចន្ទ មន្ត្រីអង់គ្លេសបានអះអាងថា សហរដ្ឋអាមេរិកបានផ្អាកកិច្ចព្រមព្រៀងនេះ កាលពីសប្តាហ៍មុន ដោយបន្ថែមថា រដ្ឋបាលរបស់លោកប្រធានាធិបតីអាមេរិក Donald Trump កំពុងជំរុញឲ្យមានសម្បទានពីចក្រភពអង់គ្លេស នៅក្នុងវិស័យពាណិជ្ជកម្ម ខាងក្រៅភាពជាដៃគូបច្ចេកវិទ្យានេះ។

សារព័ត៌មាន FT បានបញ្ជាក់បន្ថែមថា មន្ត្រីសហរដ្ឋអាមេរិកមានការខកចិត្តកាន់តែខ្លាំងឡើងៗ ចំពោះកង្វះឆន្ទៈរបស់ចក្រភពអង់គ្លេស ក្នុងការដោះស្រាយនូវអ្វីដែលហៅថា របាំងមិនមែនពន្ធ ដែលមានរួមទាំងច្បាប់ និងបទប្បញ្ញត្តិគ្រប់គ្រងម្ហូបអាហារ និងទំនិញឧស្សាហកម្មផងដែរ។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានឡើយ។ ហើយសេតវិមាន និងរដ្ឋាភិបាលអង់គ្លេស ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយពីសារព័ត៌មាន Reuters។

គួររំលឹកថា កាលពីខែកញ្ញា ក្នុងអំឡុងពេលមានទស្សនកិច្ចរបស់លោក Trump នៅចក្រភពអង់គ្លេស ប្រទេសទាំង២ បានយល់ព្រមលើ «កិច្ចព្រមព្រៀងវិបុលភាពបច្ចេកវិទ្យា» ដើម្បីលើកកម្ពស់ទំនាក់ទំនងក្នុងវិស័យ AI កុំព្យូទ័រកង់ទិច និងថាមពលនុយក្លេអ៊ែរស៊ីវិល៕