ប្រទេសស៊ូដង់ ជាថ្មីម្ដងទៀតបានស្ថិតនៅទីកំពូលនៃតារាងតាមដានវិបត្តិមនុស្សធម៌ពិភពលោក ដែលចេញផ្សាយដោយស្ថាប័នផ្ដល់ជំនួយ គឺគណៈកម្មាធិការជួយសង្គ្រោះអន្តរជាតិ (IRC) ខណៈដែលភាគីជម្លោះកំពុងបន្តសង្គ្រាមដែលបានបណ្ដាលឲ្យមនុស្សរាប់ម៉ឺននាក់បាត់បង់ជីវិត។

នេះគឺជាលើកទី៣ ហើយ ដែលស៊ូដង់បានឈរលើគេបំផុតក្នុងបញ្ជីដែលត្រូវបានចុះផ្សាយ នៅថ្ងៃអង្គារ (ទី១៦ ខែធ្នូ) នេះ។ បញ្ជីនោះបង្ហាញពីប្រទេសចំនួន ២០ ដែលប្រឈមនឹងហានិភ័យបំផុតនៃការមានគ្រោះអាសន្នមនុស្សធម៌ថ្មី ឬមានសភាពកាន់តែអាក្រក់ទៅៗ។

នាយកប្រតិបត្តិ IRC លោក David Miliband បានលើកឡើងនៅក្នុងសេចក្តីថ្លែងការណ៍មួយថា៖ «អ្វីដែល IRC កំពុងមើលឃើញនៅទីនោះ គឺថា នេះមិនមែនជាឧបទ្ទវហេតុសោកនាដកម្មនោះឡើយ។ ពិភពលោកមិនត្រឹមតែមិនអាចឆ្លើយតបទៅនឹងវិបត្តិនោះប៉ុណ្ណោះទេ តែសកម្មភាព និងពាក្យសម្ដី កំពុងធ្វើឲ្យវាកាន់តែអូសបន្លាយ និងបណ្ដោយឲ្យវាកើតឡើងធម្មតា»។

លោកបានសង្កត់ធ្ងន់ថា៖ «ទំហំនៃវិបត្តិនៅស៊ូដង់ ដែលជាប់ចំណាត់ថ្នាក់ទី១ ក្នុងបញ្ជីតាមដានឆ្នាំនេះ ៣ឆ្នាំជាប់ៗគ្នា និងដែលឥឡូវនេះជាវិបត្តិមនុស្សធម៌ដ៏ធំបំផុតមិនធ្លាប់មាន គឺជាការចុះហត្ថលេខាព្រមឲ្យមានវិបត្តិនេះ»។

សូមបញ្ជាក់ថា សង្គ្រាមនៅស៊ូដង់ បានផ្ទុះឡើងក្នុងខែមេសា ឆ្នាំ២០២៣ ដោយសារការប្រយុទ្ធដណ្ដើមអំណាច រវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) នៅមុនការផ្លាស់ប្តូរដែលបានគ្រោងទុក ទៅជាការគ្រប់គ្រងស៊ីវិល ហើយបានបង្កឲ្យមានវិបត្តិជនភៀសខ្លួនដ៏ធំបំផុតរបស់ពិភពលោក ដោយមនុស្សជាង ១២លាននាក់ ត្រូវបានភៀសខ្លួនរួចហើយ ដោយសារសង្រ្គាមដែលកំពុងបន្តមាននេះ៕