ក្រុមវេជ្ជបណ្ឌិតនៅដែនដីអង់គ្លេស របស់ចក្រភអង់គ្លេស នឹងចាប់ផ្តើមចេញធ្វើកូដកម្មរយៈពេល ៥ថ្ងៃនៅថ្ងៃពុធ (១៧ ធ្នូ) នេះ ជុំវិញប្រាក់ឈ្នួល និងលក្ខខណ្ឌការងារដ៏លំបាក ក្នុងអំឡុងពេលមានការកើនឡើងខ្លាំងនៃករណីជំងឺគ្រុនផ្តាសាយ និងជម្លោះដ៏ជូរចត់ដែលហាក់គ្មានទីបញ្ចប់រវាងរដ្ឋាភិបាល និងសហជីពគ្រូពេទ្យ។

សកម្មភាពនេះគឺជាកូដកម្មចុងក្រោយបង្អស់ក្នុងចំណោមកូដកម្មជាបន្តបន្ទាប់នៅឆ្នាំ២០២៥ ដោយ "គ្រូពេទ្យស្នាក់នៅប្រចាំការ" ឬគ្រូពេទ្យហាត់ការ ដែលមានចំនួនជិតពាក់កណ្តាលនៃកម្លាំងពលកម្មវេជ្ជសាស្ត្រសរុប ខណៈបុគ្គលិកវិស័យវេជ្ជសាស្រ្តទាំងនោះនិយាយថា ប្រាក់ខែរបស់ពួកគេថយចុះអស់ជាង ១ទសវត្សរ៍មកហើយ។

រដ្ឋាភិបាលនិយាយថា ខ្លួនមិនអាចមានលទ្ធភាពដំឡើងប្រាក់ខែច្រើនជាងអ្វីដែលខ្លួនបានធ្វើរួចទៅហើយនោះទេ ហើយរដ្ឋមន្ត្រីក្រសួងសុខាភិបាល លោក Wes Streeting បានហៅកូដកម្មទាំងនេះថា "យកតែចិត្តខ្លួនឯង គ្មានភាពទទួលខុសត្រូវ និងគ្រោះថ្នាក់"។

មិនយូរប៉ុន្មានបន្ទាប់ពីជាប់ឆ្នោតកាលពីឆ្នាំមុន រដ្ឋាភិបាលបក្សការងារ យល់ព្រមដំឡើងប្រាក់ខែ ២២% សម្រាប់គ្រូពេទ្យ ដើម្បីបញ្ចប់ជម្លោះ ដែលចាប់ផ្តើមក្រោមរដ្ឋាភិបាលអភិរក្សនិយមពីមុន។ ប៉ុន្តែក្រោយពីដំឡើងប្រាក់ឈ្នួល ៥,៤% បន្ថែមទៀតនៅឆ្នាំនេះ កំហឹងសហជីពបានផ្ទុះឡើងជាថ្មី។ សមាគមវេជ្ជសាស្ត្រអង់គ្លេស BMA ដែលជាសហជីពតំណាងឱ្យគ្រូពេទ្យប្រចាំការ ចង់ឱ្យដំឡើងប្រាក់ខែ ២៩% នៅឆ្នាំនេះ ដើម្បីស្តារប្រាក់បៀវត្សរ៍ឱ្យដល់កម្រិតឆ្នាំ២០០៨ វិញ តាមលក្ខខណ្ឌជាក់ស្តែង៕